മാർ സ്ലീവാ മെഡിസിറ്റിയിൽ ഹാർട്ട് ഫെയിലർ ക്ലിനിക്ക് തുടങ്ങി

പാലാ ഹൃദ്രോ​ഗ സംബന്ധമായ രോ​ഗചികിത്സയ്‌ക്കായി ചേർപ്പുങ്കൽ മാർ സ്ലീവാ മെഡിസിറ്റിയിൽ കാർഡിയാക് സയൻസ് വിഭാ​ഗത്തിന്റെ നേതൃത്വത്തിൽ ഹാർട്ട് ഫെയിലർ ക്ലിനിക്ക്‌ പ്രവർത്തനം ആരംഭിച്ചു. ഹൃദ്രോ​ഗികൾക്കും ഹൃദ്രോ​ഗലക്ഷണങ്ങൾ ഉള്ളവർക്കും ആധുനിക സമ​​ഗ്ര ചികിത്സകൾ ഉറപ്പാക്കുക എന്ന ലക്ഷ്യത്തോടെ പ്രവർത്തിക്കുന്ന കേന്ദ്രത്തിൽ ജന്മനാ ഹൃദ്രോ​ഗബാധിതരായ രോഗികൾ, ജീവിതശൈലി രോ​ഗം, ഹൃദയത്തിന്റെ പമ്പിങ് കുറഞ്ഞവർ, ഹൃദ്രോ​ഗ ചികിത്സ നടത്തി വരുന്നവർ എന്നിവർക്ക്‌ സേവനം പ്രയോജനപ്പെടും. ഹൃദ്രോ​ഗചികിത്സ രം​ഗത്തെ പ്രമുഖരും വി​​ദ​ഗ്ധരുമായ ഡോക്ടർമാരുടെ നേതൃത്വത്തിലാണ് പ്രവർത്തനം. ക്ലിനിക്കിൽ ഉൾപ്പെടുന്നവർക്ക് വ്യക്തി​ഗത ചികിത്സാപദ്ധതികളും പ്രത്യേക കൺസൾട്ടേഷൻ പാക്കേജുകളും ലഭ്യമാകും. ഡോക്ടർമാരുടെ പരിശോധനകളെ തുടർന്നാണ് ക്ലിനിക്കിലേക്ക് അർഹരായവരെ കണ്ടെത്തുന്നത്. എല്ലാ ദിവസവും ക്ലിനിക്കിന്റെ സേവനം ലഭ്യമാണ്. രോ​ഗികൾക്കായി പ്രത്യേക ഹെൽത്ത് സ്ക്രീനിങ്‌ കാർഡ്‌, വി​ദ​ഗ്ധ ചികിത്സ ആവശ്യമുള്ളവർക്ക് 24 മണിക്കൂറും വി​ദ​ഗ്ധരെ ബന്ധപ്പെടാൻ അവസരം എന്നിവ ഉണ്ടാകും. അനൂപ് ജേക്കബ് എംഎൽഎ ക്ലിനിക്ക്‌ ഉദ്ഘാടനംചെയ്‌തു. പാലാ ബിഷപ്പ് മാർ ജോസഫ് കല്ലറങ്ങാട്ട് അധ്യക്ഷനായി. ഹാർട്ട് ഫെയിലർ ക്ലിനിക്കിനെക്കുറിച്ച് കാർഡിയാക് സയൻസസ് വിഭാ​ഗം മേധാവി ഡോ. രാംദാസ് നായിക് വിശദീകരിച്ചു. ആശുപത്രി മാനേജിങ്‌ ഡയറക്ടർ മോൺ. ഡോ. ജോസഫ് കണിയോടിക്കൽ, ചീഫ് ഓഫ് മെഡിക്കൽ സർവീസസ് എയർ കോമഡോർ ഡോ. പോളിൻ ബാബു എന്നിവർ സംസാരിച്ചു.