കവിത: ഒരേ... ‐അൻവർ അലി

സ്വാമി അന്തർനീരവിന്

എന്റെ അതിർത്തി അറബിക്കടൽ

നിന്റേത് പാകിസ്ഥാൻ

എന്നിട്ടും നമ്മൾ

ഒരേ അതിരില്ലാറിപ്പബ്ലിക്കിലെ പൗരരായി

ഞാൻ തല നരച്ച അവിശ്വാസി

നിനക്ക് ശിഖയും തലപ്പാവുമുണ്ട്

എന്നിട്ടും നാം ജീവിക്കുന്നത് ഒരേ മതത്തിൽ

ആദ്യമായി നീയെന്നെ ഫോണിൽ വിളിച്ചത് വിസ്‌കി മോന്താനാണ്

അന്ന് നിന്റെ മുറിയിലിരുന്ന് ഞാൻ ആദ്യമായി കശ്‌മീരിച്ചായ മൊത്തി

നമ്മൾ ജന്മാന്തരമിത്രങ്ങളായിരുന്നു

ഞാൻ ദ്രാവിഡത്തിന്റെ ചുടുവെയിലും

പെരുമഴയും പാടി

നീ പഹാഡിയുടെ ഹിമപർവതത്തിലാറാടി

നമ്മുടേത് ഒരേ താളം

എന്റെ മകൾ തൃശൂരിലിരുന്ന്

ഛൊങ് ചിയോങ്ങിന്റെ ഗൃഹാതുരച്ചിന്തു കേൾക്കുന്നു

നിന്റെ മകൾ ടൊറെന്റോയിലിരുന്ന്

ലാൽദെദ്സൂക്തമുരുവിടുന്നു

നമുക്ക് ഒരേ മകൾ

ഞാൻ അമൃത്‌സറിലും

നീ കൊച്ചിയിലും വന്നപ്പോൾ

നമ്മൾ ചവിട്ടിനിന്നത്

ഒരേ കനലാഴിയിൽ

ഞാൻ ഈ വരികൾ മലയാളത്തിൽ നിനക്കയയ്‌ക്കുന്നു

നീ പഞ്ചാബിയിൽ ഉറക്കെ വായിക്കുന്നു

ഒരേ കവിതയാണ് നാം .

കുറിപ്പ്: ജമ്മു കശ്‌മീരിലെ പാക് അതിർത്തിയോടുചേർന്ന

പൂഞ്ച് എന്ന മലയോര ജില്ലയിൽ ജനിച്ചുവളർന്ന പഞ്ചാബി പഹാഡി കവി.