തമിഴ്നാട്ടിൽ പത്തുവയസുകാരിയെ തട്ടിക്കൊണ്ടുപോയി ലൈംഗികമായി പീഡിപ്പിച്ചു

ചെന്നൈ : തമിഴ്നാട്ടിൽ പത്തുവയസുകാരിയെ തട്ടിക്കൊണ്ടുപോയി ലൈംഗികാതിക്രമത്തിനിരയാക്കി. തമിഴ്നാട്ടിലെ തിരുവള്ളൂരിലാണ് സംഭവം. പോക്സോ പ്രകാരം പൊലീസ് കേസ് രജിസ്റ്റർ ചെയ്തിട്ടുണ്ട്. അക്രമി കുട്ടിയെ ബലമായി കൊണ്ടുപോകുന്നതിന്റെ സിസിടിവി ദൃശ്യങ്ങൾ പുറത്തുവന്നു.

ഒറ്റയ്ക്ക് നടന്നുപോകുന്ന പെൺകുട്ടിയെ അജ്ഞാതൻ പിന്തുടരുന്നതും, ആളൊഴിഞ്ഞ ഇടത്തുവച്ച് പെൺകുട്ടിയെ ബലമായി എടുത്തുകൊണ്ടുപോകുന്നതും വീഡിയോയിൽ കാണാം. അഞ്ച് ദിവസം മുമ്പാണ് അതിക്രമം നടന്നത്. അവശയായ പെൺകുട്ടി വീട്ടിലെത്തി വീട്ടുകാരെ കാര്യം അറിയിച്ചു. ഇതോടെയാണ് വിവരം പുറത്ത് വരുന്നത്. തുടർന്ന് കുടുംബം പൊലീസിൽ പരാതി നൽകുകയായിരുന്നു. കുട്ടിയെ വൈദ്യപരിശോധനക്ക് വിധേയയാക്കി. നിലവിൽ ആശുപത്രിയിൽ ചികിത്സയിൽ തുടരുകയാണ് കുട്ടി.

കുറ്റവാളിയെ പിടികൂടാൻ പ്രത്യേക സംഘങ്ങൾ രൂപീകരിച്ചതായി മുതിർന്ന പൊലീസ് ഉദ്യോ​ഗസ്ഥൻ പറഞ്ഞു. ഇപ്പോൾ കൂടുതൽ വിവരങ്ങളൊന്നും വെളിപ്പെടുത്താൻ കഴിയില്ലെന്നും പൊലീസ് പറയുന്നു.