ഫാർമസി പഠനം: അവസരങ്ങൾ, സാധ്യതകൾ

ആരോഗ്യപരിപാലനരംഗത്തെ ഏറ്റവും നിർണായകമായ തൊഴിൽ മേഖലയാണ് ഫാർമസി. മരുന്നുകളുടെ നിർമാണം, വിതരണം, ഗുണനിലവാര പരിശോധന, അവയുടെ ഗവേഷണം, പാര്‍ശ്വഫലങ്ങളെക്കുറിച്ചുള്ള പഠനം തുടങ്ങിയവയുമായി ബന്ധപ്പെട്ട പഠനശാഖയാണ് ഫാര്‍മസി. ​

തൊഴിലവസരങ്ങൾ

​ഫാർമസ്യൂട്ടിക്കൽ ഇൻഡസ്ട്രി,ഹോസ്പിറ്റലുകൾ, ഫാർമസികൾ, ഗവ. ഡിപ്പാർട്ട്മെന്റുകൾ (ഡ്രഗ്‌ ഇൻസ്പെക്ടർ, ഡ്രഗ്‌ അനലിസ്റ്റ്) തുടങ്ങിയ മേഖലകളിൽ തൊഴിലവസരങ്ങളുണ്ട്. ഉപരിപഠനത്തിന് ശേഷം അധ്യാപനം, ഗവേഷണം തുടങ്ങിയ മേഖലകളിലും പ്രവർത്തിക്കാം. ​

പഠനാവസരങ്ങൾ ​

പ്ലസ്ടു വിദ്യാര്‍ഥികൾ‍ക്ക് പരിഗണിക്കാവുന്ന ഫാര്‍മസി മേഖലയിലെ പ്രധാന പഠനാവസരങ്ങളെ പരിചയപ്പെടാം. ​

ബിഫാം (ബാച്ചിലർ ഓഫ് ഫാർമസി) ​ഫാര്‍മസി മേഖലയിലെ ബിരുദ കോഴ്‌സാണ് ബിഫാം. നാല് വര്‍ഷമാണ് കോഴ്സ് ദൈർഘ്യം. ഇംഗ്ലീഷ്, ഫിസിക്‌സ്, കെമിസ്ട്രി, മാത്തമാറ്റിക്‌സ്/ ബയോളജി വിഷയങ്ങള്‍ പഠിച്ച് ഹയർ സെക്കൻഡറി അല്ലെങ്കില്‍ തത്തുല്യ പരീക്ഷ പൂര്‍ത്തിയാക്കിയവര്‍ക്ക് അപേക്ഷിക്കാം. കേരള എൻട്രൻസ് കമീഷണർ നടത്തുന്ന പ്രത്യേക പ്രവേശന പരീക്ഷ ( KEAM ) വഴിയാണ് പ്രവേശനം . കെമിസ്ട്രി,ഫിസിക്‌സ് പേപ്പറുകളിൽ യഥാക്രമം 45,30 ചോദ്യങ്ങളടങ്ങിയ 90 മിനിറ്റ് ദൈർഘ്യമുള്ള ഓൺലൈൻ പരീക്ഷയാണ്.

കേരളത്തില്‍ അഞ്ച് ഗവ. സ്ഥാപനങ്ങളും 53 സ്വാശ്രയ സ്ഥാപനങ്ങളുമാണുള്ളത്. ഗവ. സ്ഥാപനങ്ങളിലെ മുഴുവന്‍ സീറ്റുകളും സ്വാശ്രയ കോളജുകളിലെ 50 ശതമാനം സീറ്റുകളുമാണ് കീം റാങ്ക് ലിസ്റ്റ് വഴി നികത്തുന്നത്. ബാക്കി 50 ശതമാനം സ്വാശ്രയ സീറ്റുകള്‍ക്ക് കീം ബിഫാം റാങ്ക് നിര്‍ബന്ധമില്ല. താൽപ്പര്യമുള്ള സ്ഥാപനങ്ങളില്‍ നേരിട്ട് അപേക്ഷിച്ചാല്‍ മതി.

ബിഫാം പഠനത്തിന് ശേഷം എംഫാം (മാസ്റ്റർ ഓഫ് ഫാർമസി), ഫാംഡി (ലാറ്ററൽ പ്രവേശനം), എംബിഎ ഫാർമസ്യൂട്ടിക്കൽ മാനേജ്മെന്റ്‌, എംബിഎ ഫാർമ മാർക്കറ്റിങ്‌, എംഎസ്‌സി ക്ലിനിക്കൽ റിസർച്ച് /ബയോ ഇൻഫർമാറ്റിക്സ് /ഫാർമസ്യൂട്ടിക്കൽ കെമിസ്ട്രി,എംടെക് ബയോടെക്നോളജി/മെഡിക്കൽ ബയോടെക്നോളജി/ബയോ ഇൻഫർമാറ്റിക്സ് തുടങ്ങിയ മേഖലകളില്‍ ഉപരിപഠനം നടത്താം. ​

ഡിഫാം (ഡിപ്ലോമ ഇന്‍ ഫാര്‍മസി) ​രണ്ട് വര്‍ഷ പഠനവും മൂന്ന് മാസ പ്രായോഗിക പരിശീലനവുമടങ്ങിയ ഫാര്‍മസി ഡിപ്ലോമ കോഴ്‌സുകള്‍ സര്‍ക്കാര്‍ മേഖലയിലും അംഗീകൃത സ്വകാര്യ ഫാര്‍മസി കോളേജുകളിലും ലഭ്യമാണ്. പ്ലസ്ടുവിന് ഫിസിക്‌സ്, കെമിസ്ട്രി എന്നിവയോടൊപ്പം ബയോളജി അല്ലെങ്കില്‍ മാത്തമാറ്റിക്‌സ് ഒരു വിഷയമായി പഠിച്ചിരിക്കണം. പ്രത്യേക പ്രവേശന പരീക്ഷയില്ല. പ്ലസ്ടു മാര്‍ക്കിന്റെ അടിസ്ഥാനത്തില്‍ എല്‍ബിഎസ് സെന്റര്‍ വഴിയാണ് അഡ്മിഷന്‍. (www.lbscentre.kerala.gov.in). ഡിഫാമുകാര്‍ക്ക് ലാറ്ററൽ എന്‍ട്രി വഴി ബിഫാം പ്രവേശനത്തിന് അവസരമുണ്ട് വിവരങ്ങൾക്ക്: www.cee.kerala.gov.in ​

ഫാംഡി ​ഫാര്‍മസി പഠനരംഗത്ത് താരതമ്യേന പുതിയ കോഴ്‌സാണ് ഫാംഡി. ഗവേഷണത്തിനും ക്ലിനിക്കല്‍ പ്രാക്ടീസിനുമാണ് മുൻതൂക്കം. ഫിസിക്‌സ്, കെമിസ്ട്രി, ബയോളജി/ മാത്തമാറ്റിക്‌സ് വിഷയങ്ങള്‍ക്ക് മൊത്തം 50 ശതമാനം മാര്‍ക്കില്‍ കുറയാതെയുമുള്ള പ്ലസ്ടു അല്ലെങ്കില്‍ തത്തുല്യ പരീക്ഷാ വിജയമാണ് യോഗ്യത. 50 ശതമാനം മാര്‍ക്കോടെ ഡിഫാം പൂർത്തിയാക്കിയവര്‍ക്കും അപേക്ഷിക്കാം.

കേരളത്തില്‍ സ്വാശ്രയ സ്ഥാപനങ്ങളിലാണ് പഠനാവസരമുള്ളത്. അതത് സ്ഥാപനത്തില്‍ നേരിട്ട് അപേക്ഷിക്കണം. ആറ് വര്‍ഷ കോഴ്സാണ്. അവസാന വര്‍ഷം ഇന്റേണ്‍ഷിപ്പാണ്. വിജയകരമായി പഠനം പൂര്‍ത്തിയാക്കുന്നവര്‍ക്ക് ക്ലിനിക്കല്‍ ഫാര്‍മസിസ്റ്റായി പ്രവര്‍ത്തിക്കാം. ഇന്ത്യയില്‍ അവസരങ്ങള്‍ കുറവാണെങ്കിലും വിദേശ രാജ്യങ്ങളില്‍ ക്ലിനിക്കല്‍ ഫാര്‍മസിസ്റ്റുകള്‍ക്ക് മികച്ച തൊഴിലവസരങ്ങളുണ്ട്. ബിഫാം ബിരുദധാരികള്‍ക്ക് ഫാംഡി (പോസ്റ്റ് ബക്കാലോറിയറ്റ്) കോഴ്‌സ് വഴി മൂന്ന് വര്‍ഷംകൊണ്ട് ഫാംഡി ബിരുദം നേടാം. രണ്ട് വര്‍ഷ പഠനത്തോടൊപ്പം ഒരു വര്‍ഷം ഇന്റേണ്‍ഷിപ്പുമാണ്. ​

ബിഫാം (ആയുർവേദ) ​നാലുവർഷ കോഴ്സാണിത്. രണ്ട് മാസം പരിശീലനവുമുണ്ട്. ഫിസിക്സ്,കെമിസ്ട്രി, ബയോളജി വിഷയങ്ങൾക്ക് 50 ശതമാനത്തിൽ കുറയാത്ത മാർക്ക് വാങ്ങി പ്ലസ്ടു പരീക്ഷാ വിജയമാണ് യോഗ്യത. കണ്ണൂർ പറശ്ശിനിക്കടവ് ആയുർവേദ മെഡിക്കൽ കോളേജിലാണ് ഈ കോഴ്സുള്ളത്. 50 സീറ്റുകളുണ്ട്. വിവരങ്ങൾക്ക്:www.lbs centre.kerala.gov.in ​സർട്ടിഫിക്കറ്റ് കോഴ്സ് ഇൻ ഫാർമസി (ഹോമിയോ) ​തിരുവനന്തപുരം, കോഴിക്കോട് ഗവ. ഹോമിയോ മെഡിക്കൽ കോളേജുകളിൽ ഹോമിയോ ഫാർമസിയിൽ സർട്ടിഫിക്കറ്റ് കോഴ്സുണ്ട്. ഒരു വർഷം ദൈർഘ്യമുള്ള കോഴ്സിന്റെ യോഗ്യത പത്താം ക്ലാസ് വിജയമാണ്. വിവരങ്ങൾക്ക്: www.lbscentre.kerala.gov.in ​

പ്രധാന സ്ഥാപനങ്ങൾ ​

നാഷണൽ ഇൻസ്റ്റിറ്റ്യൂട്ട് ഓഫ് ഫാർമസ്യൂട്ടിക്കൽ എജുക്കേഷൻ & റിസർച്ച് (എൻഐപിഇആർ -NIPER)ന്റെ വിവിധ ക്യാമ്പസുകളായ മൊഹാലി, അഹമ്മദാബാദ്, ഗുവാഹത്തി, ഹാജിപ്പൂര്‍, ഹൈദരാബാദ്, കൊല്‍ക്കത്ത, റായ്ബറേലി എന്നിവിടങ്ങളില്‍ ഫാര്‍മസി മേഖലയിലെ വിവിധ കോഴ്‌സുകളുണ്ട്. ബിര്‍ള ഇന്‍സ്റ്റിറ്റ്യൂട്ട് ഓഫ് ടെക്‌നോളജി & സയന്‍സ് പിലാനി, ഇന്‍സ്റ്റിറ്റ്യൂട്ട് ഓഫ് കെമിക്കല്‍ ടെക്‌നോളജി മുംബൈ തുടങ്ങിയവയും ഈ മേഖലയിലെ മികച്ച സ്ഥാപനങ്ങളാണ്.

ഇന്ദിരാഗാന്ധി നാഷണൽ ട്രൈബൽ യൂണിവേഴ്സിറ്റി, ഹേമാവതി നന്ദൻ ബഹുഗുണ അഗർവാൾ യൂണിവേഴ്സിറ്റി തുടങ്ങിയ സെൻട്രൽ യൂണിവേഴ്സിറ്റികളിൽ സിയുഇടി യുജി വഴി ബിഫാമിന് പ്രവേശനം നേടാം. ജിപാറ്റ് ( GPAT -ഗ്രാജ്വേറ്റ് ഫാർമസി ആപ്റ്റിറ്റ്യൂഡ് ടെസ്റ്റ്) എന്ന ദേശീയതല പ്രവേശന പരീക്ഷ വഴി സ്റ്റൈപ്പന്റോടുകൂടി, വിവിധ സ്ഥാപനങ്ങളില്‍ എംഫാം കോഴ്‌സ് പഠിക്കാം. ഹാര്‍വാര്‍ഡ് യൂണിവേഴ്‌സിറ്റി, കേംബ്രിഡ്ജ് യൂണിവേഴ്‌സിറ്റി, ജോണ്‍ ഹോപ്കിന്‍സ് യൂണിവേഴ്‌സിറ്റി തുടങ്ങിയ വിദേശ യൂണിവേഴ്‌സിറ്റികളും ഫാര്‍മസി മേഖലയിൽ കോഴ്സുകൾ നൽകുന്നുണ്ട്.