എസ്​ബിഐയിൽ അവസരം: 6589 ജൂനിയർ അസോസിയേറ്റ്​

ജൂനിയർ അസോസിയേറ്റ് (ക്ലർക്ക്) തസ്തികയിലെ 6589 ഒഴിവുകളിലേക്ക് സ്​റ്റേറ്റ്​ ബാങ്ക്​ ഓഫ്​ ഇന്ത്യ വിജ്ഞാപനം പ്രസിദ്ധീകരിച്ചു. ജൂനിയർ അസോസിയേറ്റ്സ് (കസ്റ്റമർ സപ്പോർട്ട് & സെയിൽസ്) - റെഗുലർ 5180, ജൂനിയർ അസോസിയേറ്റ്സ് (കസ്റ്റമർ സപ്പോർട്ട് & സെയിൽസ്) - ബാക്ക്‌ലോഗ് 1409 എന്നിങ്ങനെയാണ്​ അവസരം. കേരളവും ലക്ഷദ്വീപും ഉൾപ്പെടുന്ന തിരുവനന്തപുരം സർക്കിളിൽ റെഗുലർ 250 ഒഴിവുണ്ട്​. ബാക്ക്​ ലോഗ്​ വിഭാഗത്തിലുംഅവസരമുണ്ട്​.

യോഗ്യത: ഏതെങ്കിലും വിഷയത്തിലുള്ള ബിരുദം. ഒരു സംസ്ഥാനം/കേന്ദ്രഭരണ പ്രദേശത്തിലേക്കാണ്​ അപേക്ഷിക്കാൻ അർഹത. ഓൺലൈൻ പ്രിലിമിനറി പരീക്ഷയുടെയും മെയിൻ പരീക്ഷയുടെയും പ്രാദേശിക ഭാഷാ പരിജ്ഞാനത്തിന്റെയും അടിസ്ഥാനത്തിലാണ്​ തിരഞ്ഞെടുപ്പ്​. ഇവ യഥാക്രമം സെപ്​തംബർ, നവംബർ മാസങ്ങളിൽ നടക്കും. ഇംഗ്ലീഷ്​, ഹിന്ദി, മലയാളം മീഡിയത്തിൽ ചോദ്യപേപ്പറുകൾ ലഭിക്കും. തിരുവനന്തപുരം, കൊല്ലം, കോട്ടയം, എറണാകുളം, ആലപ്പുഴ, ഇടുക്കി, പാലക്കാട്​, തൃശൂർ, മലപ്പുറം, കോഴിക്കോട്​, കണ്ണൂർ എന്നിവിടങ്ങളിൽ പരീക്ഷാകേന്ദ്രങ്ങളുണ്ട്​. ലക്ഷദ്വീപിൽ കവരത്തിയാണ്​ പരീക്ഷാകേന്ദ്രം.

അപേക്ഷിക്കുന്ന ഇടത്തെ പ്രാദേശിക ഭാഷ കൈകാര്യംചെയ്യുന്നതിലും മികച്ച പ്രാവീണ്യം വേണം. ഓൺലൈൻ പരീക്ഷകൾക്കുശേഷമുള്ള പരിശോധനയിൽ ഇവ പരിഗണിക്കും. പരാജയപ്പെടുന്നവർ അയോഗ്യരാകും. പത്താംക്ലാസിലോ പ്ലസ്​ ടുവിലെ ഭാഷ ഒരു വിഷയമായി പഠിച്ചവർക്ക്​ ഭാഷാപരിശോധന ആവശ്യമില്ല.

പ്രായപരിധി: 20 – 28 വയസ്​. നിയമാനുസൃത ഇളവ്​ ലഭിക്കും. അപേക്ഷ ഫീസ്:  750 രൂപ. എസ്‌സി/ എസ്ടി/ പിഡബ്ല്യുബിഡി/ എക്സ്എസ്/ഡിഎക്സ്എസ് വിഭാഗത്തിന്​ ഫീസില്ല. www.bank.sbi/web/careers/current-openings ലിങ്ക്​ വഴി ഓൺലൈനായി അപേക്ഷിക്കാം. അവസാന തീയതി : ആഗസ്​ത്​ 26. വിവരങ്ങൾ www.bank.sbiൽ ലഭിക്കും.