അമര പടർന്നേറും, ഇതാണ് വിത്തിടാൻ പറ്റിയ സമയം

മഴക്കാലം വീട്ടുവളപ്പിലെ പച്ചക്കറി കൃഷി നിർത്തി വെക്കാറാണ്. എന്നാൽ മഴയെന്നോ വെയിലെന്നോ ഇല്ലാതെ പടർന്നേറുന്ന ചെടിയാണ് അമര.

ഒന്നരയടി സമചതുരത്തിൽ കുഴിയെടുത്ത് പച്ചിലയും ചാണകവും എല്ലു പൊടിയും ചേർത്ത് മേല്‍മണ്ണിട്ട് മൂടുക. ഏഴു ദിവസത്തിന് ശേഷം അവിടെ തടം തീർത്ത് അമര നടാം. ജൂലൈ ആഗസ്ത് മാസത്തില്‍ നട്ടാൽ ഒക്ടോബർ നവംബർ ആകുമ്പോഴേക്ക് പുഷ്പിക്കും.

ഓരോ കുഴിയിലും അഞ്ച് വിത്തെങ്കിലും വേണം പാകാൻ. കനത്ത മഴ കൊണ്ടാൽ തൈ ചെരിഞ്ഞ് പോകും. പ്രോ ട്രേയിൽ മുളപ്പിച്ച് മാറ്റി നടുന്നതാണ് നല്ലത്. ഒരു തടത്തില്‍ കരുത്തുള്ള മൂന്ന് തൈകള്‍ മാത്രം നിര്‍ത്തി ബാക്കിയുള്ളവ പറിച്ചുമാറ്റണം. ഗ്രോ ബാഗിലാണെങ്കിൽ കരുത്തുള്ള ഒരു തൈ നിർത്തിയാൽ ധാരാളം.

വള്ളി ഉയർന്ന് തുടങ്ങുമ്പോൾ താങ്ങും പിന്നെ പന്തലുമിട്ട് നൽകണം. വേലിയിൽ പടർത്തിയും വളർത്താം. ചെടികള്‍ക്കു ചുറ്റും വെള്ളം പുറത്തേക്ക് ഒഴുകാതെ തടമെടുക്കണം.

രണ്ടുപിടി ചാണകവും ഒരു പിടിചാരവും 50 ഗ്രാം രാജ്‌ഫോസും യോജിപ്പിച്ചെടുത്താല്‍ അമരയ്ക്ക് ആവശ്യത്തിന് വളക്കൂട്ടായി. പൂക്കുന്ന സമയത്ത് പോട്ടാസ്യം അടങ്ങിയ വളങ്ങൾ നൽക്കുക. ധാരാളം പൂവും കായും ഉണ്ടാവും.

രോഗകീടാക്രമണങ്ങൾ അമരയിൽ പതിവില്ല. പയർ ചായിയുടെ ആക്രമണം ഉണ്ടാവാം. 30 ശതമാനത്തോളം പ്രോട്ടീന്‍ തരുന്ന പയറിനമാണ്.

 പരിപാലിച്ചാൽ 60-75 ദിവസം കൊണ്ട് അമര വിളവ് തന്നുതുടങ്ങും. വെറും രണ്ടു മാസം കൊണ്ട് തോരൻ റെഡിയാക്കാം. ഒരു തടമുണ്ടെങ്കിൽ വീട്ടാവാശ്യത്തിന് ദിവസവും ധാരാളം കായകൾ ലഭിക്കും. വിളവെടുപ്പിന് ശേഷം വള്ളി തലപ്പുകൾ മുറിച്ച് കളഞ്ഞാൽ പുതിയ ചിനപ്പുകൾ വളരും. അവയിലും മൊട്ടുകൾ വിരിഞ്ഞ് പൂക്കൾ നിറഞ്ഞ് ധാരാളം കായകൾ ലഭിക്കും.

അമരയുടെ അടുപ്പക്കാരായ കൊത്തമരയും ചതുരപ്പയറും ജൂലായ് ആഗസ്ത് മാസത്തിലാണ് കൃഷി ചെയ്യേണ്ടത്. നട്ട് നല്ല വളര്‍ച്ചയെത്തുമ്പോഴേക്കും കിട്ടുന്ന ദൈര്‍ഘ്യം കുറഞ്ഞ പകൽ ഇവയുടെ പുഷ്പിക്കലിന് പ്രേരണ്. തണുപ്പാണ് ഇഷ്ടം. എങ്കിലും ചൂടും മഴയും വെല്ലുവിളിച്ച് വളരും.