ഇന്ത്യയ്ക്ക് വീണ്ടും തിരിച്ചടി: ജൂഡോ താരം തൂലിക മന്നും ​ഗെയിംസിൽ നിന്ന് പുറത്ത്​

ഗ്ലാസ്കോ: ഇന്ത്യയുടെ ജൂഡോ താരം തൂലിക മൻ കോമൺവെൽത്ത് ​ഗെയിംസിൽ നിന്ന് പുറത്തായി. ഉത്തേജക മരുന്ന് വിരുദ്ധ ചട്ടം ലംഘിച്ചുവെന്നാരോപിച്ചാണ് നടപടി. തൂലിക മന്നിന് ​ഗെയിംസിൽ മത്സരിക്കാനാകില്ല. ഇന്ത്യയ്ക്ക് സ്വർണ മെഡൽ പ്രതീക്ഷയുള്ള താരമായിരുന്നു തൂലിക.

12 മാസത്തിനിടെ മൂന്ന് തവണ ഡോപ്പിങ് ടെസ്റ്റിൽ പരാജയപ്പെട്ടതോടെയാണ് ദേശീയ ഉത്തേജക വിരുദ്ധ ഏജൻസി തൂലികയെ സസ്പെൻഡ് ചെയ്തത്. കഴിഞ്ഞ കോമൺവെൽത്ത് ​ഗെയിംസിൽ വെള്ളി മെഡൽ നേടിയിരുന്നു. 2022 ലെ ബർമിംഗ്ഹാം കോമൺ‌വെൽത്ത് ഗെയിംസിൽ വനിതകളുടെ +78 കിലോഗ്രാം വിഭാ​ഗത്തിലായിരുന്നു നേട്ടം.

ഇന്നലെ ഉത്തേജക മരുന്ന്‌ പരിശോധനയിൽ പരാജയപ്പെട്ട ഇന്ത്യൻ ജൂഡോ താരം അരുൺ കുമാറിനെ കോമൺവെൽത്ത്‌ ഗെയിംസിനുള്ള ടീമിൽനിന്ന് പുറത്താക്കിയിരുന്നു. 73 കിലോ വിഭാഗത്തിലായിരുന്നു മത്സരിക്കേണ്ടിയിരുന്നത്‌. മരുന്നടി തെളിഞ്ഞതിനെ തുടർന്ന്‌ ദേശീയ ഉത്തേജക മരുന്ന്‌ വിരുദ്ധ സമിതി (നാഡ) അരുണിന്‌ വിലക്കേർപ്പെടുത്തുകയായിരുന്നു. 27നാണ്‌ ടീം പുറപ്പെടുന്നത്‌.