അമേരിക്കൻ പാസ്‌പോർട്ടിൽ സ്വന്തം ചിത്രം പതിപ്പിച്ച് ഡൊണാൾഡ് ട്രംപ്; വ്യാപക വിമർശനം

വാഷിംഗ്ടൺ: അമേരിക്കൻ പാസ്‌പോർട്ടിൽ തന്റെ ചിത്രം ഉൾപ്പെടുത്തി പുതിയ ഡിസൈൻ പുറത്തിറക്കി യുഎസ് പ്രസിഡന്റ് ഡൊണാൾഡ് ട്രംപ്. പാസ്‌പോർട്ടിൽ പ്രസിഡന്റിന്റെ ചിത്രം പതിപ്പിക്കാനുള്ള ട്രംപിന്റെ തീരുമാനം അമേരിക്കയിൽ വലിയ രാഷ്ട്രീയ വിവാദങ്ങൾക്ക് തിരികൊളുത്തിയിരിക്കുകയാണ്.

അമേരിക്കൻ പാസ്‌പോർട്ടിന്റെ മുൻഭാഗത്തും ഉള്ളിലുമുള്ള പേജുകളിലും തന്റെ ചിത്രം ഉൾപ്പെടുത്തുന്ന തരത്തിലാണ് പുതിയ രൂപകൽപ്പന തയ്യാറാക്കിയിരിക്കുന്നത്. രാജ്യത്തിന്റെ ഐഡന്റിറ്റിയും ഭരണത്തലവന്റെ ഔദ്യോഗിക പദവിയും കൂടുതൽ വ്യക്തമാക്കാനാണ് ഈ മാറ്റമെന്നാണ് ഭരണകൂടത്തിന്റെ വിശദീകരണം.

എന്നാൽ, പാസ്‌പോർട്ട് പോലൊരു ഔദ്യോഗിക രേഖയെ രാഷ്ട്രീയവൽക്കരിക്കാനുള്ള ട്രംപിന്റെ നീക്കമാണിതെന്ന് പ്രതിപക്ഷ പാർട്ടികളും വിമർശകരും ആരോപിക്കുന്നു. മുൻകാലങ്ങളിൽ അമേരിക്കൻ പാസ്‌പോർട്ടുകളിൽ രാജ്യത്തിന്റെ ദേശീയ ചിഹ്നങ്ങളും ചരിത്രപരമായ അടയാളങ്ങളുമാണ് ഉണ്ടായിരുന്നത്.

ഇതിൽ നിന്ന് വ്യത്യസ്തമായി പാസ്‌പോർട്ടിന്റെ എല്ലാ പ്രധാന ഭാഗങ്ങളിലും പ്രസിഡന്റിന്റെ ചിത്രം കൊണ്ടുവന്നത് ജനാധിപത്യ വിരുദ്ധവും വ്യക്തിപൂജയെ പ്രോത്സാഹിപ്പിക്കുന്നതുമാണെന്നാണ് ഉയരുന്ന പ്രധാന വിമർശനം. ട്രംപിന്റെ ഈ നടപടിക്കെതിരെ വിവിധ കോണുകളിൽ നിന്നും പ്രതിഷേധം ഉയരുന്നുണ്ട്.

പാസ്‌പോർട്ട് എന്നത് ഒരു രാജ്യത്തിന്റെ അന്തസ്സും പരമാധികാരവും സൂചിപ്പിക്കുന്ന രേഖയാണെന്നും, അതിൽ വ്യക്തിപരമായ പ്രതിച്ഛായ പതിപ്പിക്കുന്നത് ജനാധിപത്യ രാജ്യങ്ങളിൽ കണ്ടുവരുന്ന രീതിയല്ലെന്നുമാണ് രാഷ്ട്രീയ നിരീക്ഷകർ ചൂണ്ടിക്കാട്ടുന്നത്. വിഷയത്തിൽ ഔദ്യോഗികമായ കൂടുതൽ വിശദീകരണങ്ങൾ യുഎസ് സ്റ്റേറ്റ് ഡിപ്പാർട്ട്മെന്റ് നൽകിയിട്ടില്ല.