ഫാംഹൗസ് സ്ഫോടനം: മൂന്ന് ഇറ്റാലിയൻ സൈനിക പൊലീസുകാർ കൊല്ലപ്പെട്ടു

റോം: ഇറ്റലിയിൽ ഫാംഹൗസിലുണ്ടായ സ്ഫോടനത്തിൽ മൂന്ന് സൈനിക പൊലീസ് അം​ഗങ്ങൾ കൊല്ലപ്പെട്ടു. 13 പൊലീസ് ഉദ്യോ​ഗസ്ഥർക്ക് പരിക്കേറ്റു. ഇറ്റാലിയൻ നഗരമായ വെറോണയ്ക്ക് സമീപം ഒഴിപ്പിക്കൽ നടപടികൾക്കിടയിലാണ് സ്ഫോടനമുണ്ടായത്.

വെറോണയുടെ 10 കിലോമീറ്റർ അകലെയുള്ള കാസ്റ്റൽ ഡി അസാനോ പട്ടണത്തിലാണ് സ്ഫോടനം നടന്നത്. ഒഴിപ്പിക്കൽ നടപടികൾ പുരോ​ഗമിക്കുമ്പോൾ ​ഗ്യാസ് സിലിണ്ടർ ഉപയോ​ഗിച്ച് ആസൂത്രിതമായി സ്ഫോടനം നടത്തുകയായിരുന്നെന്ന് പൊലീസ് പറഞ്ഞു.

രണ്ട് നിലകെട്ടിടത്തിൽ ​ഗ്യാസ് തുറന്നുവിട്ട നിലയിലായിരുന്നു. പൊലീസ് വാതിൽ തുറന്നപ്പോഴേക്കും സ്ഫോടനം നടന്നു. സംഭവത്തിൽ 60 വയസുള്ള സഹോദരങ്ങളെ കസ്റ്റഡിയിലെടുത്തു. മൂന്നാമത്തെ സഹോദരൻ രക്ഷപ്പെട്ടതായി പൊലീസ് പറഞ്ഞു. സൈനിക പൊലീസ് ഉദ്യോ​ഗസ്ഥരുടെ മരണത്തിൽ ഇറ്റാലിയൻ പ്രധാനമന്ത്രി ജോർജിയ മെലോണിയും പ്രതിരോധ മന്ത്രി ഗൈഡോ ക്രോസെറ്റോയും അനുശോചനം രേഖപ്പെടുത്തി.