കാലിഫോർണിയയിലെ ഷോപ്പിങ് മാളിൽ വെടിവെയ്പ്പ്; ഒരാള്‍ കൊല്ലപ്പെട്ടു

കാലിഫോർണിയ : കാലിഫോർണിയയിലെ സൊളാനോ ടൗൺ സെന്റർ ഷോപ്പിങ് മാളിലുണ്ടായ വെടിവെയ്പ്പിൽ ഒരാൾ കൊല്ലപ്പെട്ടു. വെടിവെയ്പ്പിൽ ആറ് പേർക്ക് പരിക്കേറ്റിട്ടുണ്ട്. മാളിനുള്ളിലെ സ്പിരിറ്റ് ഹാലോവീൻ സ്റ്റോറിൽ വെള്ളിയാഴ്ച രാത്രിയാണ് വെടിവെപ്പുണ്ടായത്.

അതേസമയം, സംഭവത്തിൽ ഇതുവരെയും പ്രതികളെ പിടികൂടിയിട്ടില്ല. വെള്ളിയാഴ്ച രാത്രി ഏകദേശം 8:30 ഓടെയാണ് സംഭവം നടന്നതെന്ന് പൊലീസ് പറഞ്ഞു. പരിക്കേറ്റവരിൽ മൂന്ന് പേരുടെ നില ​ഗുരുതരമാണെന്നാണ് റിപ്പോർട്ടുകൾ. മാളിനുള്ളിൽ വെടിയൊച്ച കേട്ടതോടെ ജനങ്ങൾ പരിഭ്രാന്തരായി ഓടുകയായിരുന്നു. അഞ്ച് മുതൽ ഏഴ് തവണ വരെ വെടിയൊച്ച കേട്ടതായാണ് റിപ്പോർട്ടുകൾ.

ഒന്നിലധികം പ്രതികൾ വെടിവെയ്പിൽ ഉൾപ്പെട്ടിട്ടുണ്ടെയെന്ന കാര്യം അന്വേഷിച്ച് വരികയാണെന്നും പൊലീസ് പറഞ്ഞു. സംഭവത്തെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല.