ഭൗതികശാസ്ത്ര നൊബേൽ; പുരസ്കാരം മൂന്നുപേർക്ക്, നേട്ടം ക്വാണ്ടം മെക്കാനിക്സിലെ ഗവേഷണത്തിന്

സ്റ്റോക്ഹോം: 2025ലെ ഭൗതികശാസ്ത്ര നോബൽ പ്രഖ്യാപിച്ചു. ഇലക്ട്രിക് സർക്യൂട്ടുകളിലെ മാക്രോസ്കോപ്പിക് ക്വാണ്ടം മെക്കാനിക്കൽ ടണലിംഗിൻ്റെയും ഊർജ്ജ ക്വാണ്ടൈസേഷന്റെയും സുപ്രധാന കണ്ടുപിടിത്തത്തിനായിരുന്നു പുരസ്കാരം. ജോൺ ക്ലാർക്ക് (യൂണിവേഴ്സിറ്റി ഓഫ് കാലിഫോർണിയ, ബെർക്ക്‌ലി), മിഷേൽ എച്ച് ഡെവോറെറ്റ് (യേൽ യൂണിവേഴ്സിറ്റി, യൂണിവേഴ്സിറ്റി ഓഫ് കാലിഫോർണിയ, സാൻ്റാ ബാർബറ), ജോൺ എം മാർട്ടിനിസ് (യൂണിവേഴ്സിറ്റി ഓഫ് കാലിഫോർണിയ, സാൻ്റാ ബാർബറ) എന്നിവരാണ് ഭൗതികശാസ്ത്ര നൊബേലിന് അർഹരായവർ.

1901 മുതൽ 2024 വരെ 118 തവണയായി 226 പേർക്ക് ഭൗതികശാസ്ത്രത്തിൽ നൊബേൽ നൽകിയിട്ടുണ്ട്. മെഷീൻ ലേണിങ്ങിന്റെ ബിൽഡിങ് ബ്ലോക്കുകൾ സൃഷ്ടിക്കാൻ സഹായിച്ചതിനാണ് കഴിഞ്ഞവർഷം ജോൺ ഹോപ്‌ഫീൽഡ്, ജിയോഫ്രി ഹിന്റൻ എന്നിവർക്ക് ഭൗതികശാസ്ത്ര നൊബേൽ ലഭിച്ചത്.

ഭൗതികശാസ്ത്ര നൊബേൽ പ്രഖ്യാപനത്തിന് ശേഷം, ബുധനാഴ്ച രസതന്ത്ര നൊബേലും, തുടർന്ന് വ്യാഴാഴ്ച സാഹിത്യ നൊബേൽ വെള്ളിയാഴ്ച ഏറ്റവും കൂടുതൽ ആളുകൾ ഉറ്റുനോക്കുന്ന സമാധാന നൊബേൽ സമ്മാനവും പ്രഖ്യാപിക്കും. ഒക്ടോബർ 13-ന് സാമ്പത്തിക ശാസ്ത്രത്തിലെ നൊബേൽ സ്മാരക സമ്മാനത്തോടെ നൊബേൽ വാരത്തിന് തിരശ്ശീല വീഴും.

അതിശയിപ്പിക്കുന്ന ക്വാണ്ടം മെക്കാനിക്‌സ്‌

അടുത്ത തലമുറയിലെ ക്വാണ്ടം സാങ്കേതികവിദ്യ വികസിപ്പിക്കുന്നതിനുള്ള അവസരങ്ങൾ തുറന്നിടുന്നതാണ് ജോൺ ക്ലാർക്ക്, മിഷേൽ എച്ച് ഡെവോറെ, ജോൺ എം മാർട്ടിനിസ് എന്നിവരുടെ കണ്ടുപിടിത്തം. ക്വാണ്ടം മെക്കാനിക്സ് എല്ലാ ഡിജിറ്റൽ സാങ്കേതികവിദ്യയുടെയും അടിത്തറയാണ്‌. കംപ്യൂട്ടര്‍ മൈക്രോചിപ്പുകളിലെ ട്രാൻസിസ്റ്ററുകൾ ക്വാണ്ടം സാങ്കേതികവിദ്യക്ക്‌ ഒരു ഉദാഹരണമാണ്. ക്വാണ്ടം ക്രിപ്റ്റോഗ്രഫി, ക്വാണ്ടം കംപ്യൂട്ടറുകൾ, ക്വാണ്ടം സെൻസറുകൾ തുടങ്ങിയ അടുത്ത തലമുറ ക്വാണ്ടം സാങ്കേതികവിദ്യകൾ വികസിപ്പിക്കുന്നതിനുള്ള അവസരം തുറന്നതിനാണ് മൂവര്‍ക്കും നൊബേല്‍ സമ്മാനം നല്‍കുന്നത്.

കൈയിൽ പിടിക്കാവുന്ന വലുപ്പമുള്ള ഒരു ഇലക്ട്രിക്കൽ സർക്യൂട്ടിൽ ക്വാണ്ടം ടണലിങും ക്വാണ്ടൈസ്ഡ് എനർജി ലെവലുകളും ഇവർ സാധ്യമാക്കി. 1984-ലും 1985-ലും നടത്തിയ പരീക്ഷണങ്ങളിൽ, സൂപ്പർകണ്ടക്ടറുകൾ ഉപയോഗിച്ച് നിർമിച്ച ഒരു ഇലക്ട്രോണിക് സർക്യൂട്ടാണ് ഇവർ പഠനവിധേയമാക്കിയത്. സൂപ്പർകണ്ടക്ടറുകൾക്കിടയിൽ ചാലകമല്ലാത്ത വസ്തു നേർത്ത പാളി ഉപയോഗിച്ച് നിർമിച്ച ജോസഫ്സൺ ജങ്‌ഷൻ എന്ന ഘടന ഈ സർക്യൂട്ടിൽ ഉൾപ്പെടുത്തി. സർക്യൂട്ടിന്റെ വിവിധ ഗുണങ്ങൾ കൃത്യമായി അളന്ന് നിയന്ത്രിച്ച്, അതിലൂടെ വൈദ്യുതി കടത്തിവിടുമ്പോൾ ഉണ്ടാകുന്ന പ്രതിഭാസങ്ങളാണ്‌ ഇവർ പഠനവിധേയമാക്കിയത്‌.