പാക്- അഫ്ഗാൻ അതിർത്തിയിൽ സംഘർഷം: 5 സൈനികർ കൊല്ലപ്പെട്ടു, 25 ഭീകരരെ വധിച്ചെന്ന് സൈന്യം

പെഷവാർ : പാകിസ്ഥാൻ- അഫ്​ഗാനിസ്ഥാൻ അതിർത്തിയിൽ സംഘർഷം. ഖൈബർ പഖ്തൂൺഖ്വ പ്രവിശ്യയിൽ ഏറ്റുമുട്ടലിൽ 25 തീവ്രവാദികൾ കൊല്ലപ്പെട്ടതായി പാകിസ്ഥാൻ സൈന്യം അറിയിച്ചു. ഭീകരരുമായുള്ള ഏറ്റുമുട്ടലിൽ അഞ്ച് സുരക്ഷാ ഉദ്യോഗസ്ഥരും കൊല്ലപ്പെട്ടതായി സൈന്യത്തിന്റെ മാധ്യമ വിഭാഗം പ്രസ്താവനയിൽ പറഞ്ഞു. നുഴഞ്ഞുകയറ്റ ശ്രമം തടയുന്നതിനിടെയായിരുന്നു ഏറ്റുമുട്ടലെന്ന് മാധ്യമങ്ങൾ റിപ്പോർട്ട് ചെയ്തു. കുർറാം ജില്ലയിലെ ഘാക്കിക്കും വടക്കൻ വസീറിസ്ഥാൻ ജില്ലയിലെ സ്പിൻവാമിനും സമീപമാണ് നുഴഞ്ഞുകയറ്റ ശ്രമം റിപ്പോർട്ട് ചെയ്തത്.

ഇസ്താംബൂളിൽ വെടിനിർത്തൽ കരാർ ഒപ്പുവെച്ച സാഹചര്യത്തിൽ അഫ്ഗാൻ, പാകിസ്ഥാൻ ഉദ്യോഗസ്ഥർ കൂടിക്കാഴ്ച നടത്തുന്നതിനിടെയാണ് ആക്രമണമുണ്ടായത്. വെള്ളിയാഴ്ച രാത്രി വടക്കൻ വസീറിസ്ഥാൻ, കുർറാം ജില്ലകളിൽ നടത്തിയ രണ്ട് ഓപ്പറേഷനുകളിലുമായി സുരക്ഷാ സേന വൻതോതിലുള്ള ആയുധങ്ങളും സ്ഫോടകവസ്തുക്കളും പിടിച്ചെടുത്തു.