പാക്കിസ്ഥാനിൽ ഭീകരാക്രമണം; ക്വറ്റ റെയിൽവേ സ്റ്റേഷനു സമീപം സ്ഫോടനം; നിരവധി മരണം

ക്വറ്റ: പാക്കിസ്ഥാനിലെ ബലൂചിസ്ഥാൻ പ്രവിശ്യയുടെ തലസ്ഥാനമായ ക്വറ്റയിലെ റെയിൽവേ സ്റ്റേഷനിൽ ശക്തമായ സ്ഫോടനം. സംഭവത്തിൽ നിരവധി പേർ കൊല്ലപ്പെട്ടതായും നിരവധി പേർക്ക് ഗുരുതരമായി പരിക്കേറ്റതായും റിപ്പോർട്ടുകൾ.

യാത്രക്കാരുടെ തിരക്ക് വർധിച്ചിരുന്ന സമയത്താണ് സ്‌ഫോടനം നടന്നത്. റെയിൽവേ പ്ലാറ്റ്‌ഫോമിൽ ട്രെയിൻ കാത്തുനിന്നവർക്കിടയിലാണ് പൊട്ടിത്തെറിയുണ്ടായത്. സ്ഫോടനത്തിന്റെ ശബ്ദം ഏറെ ദൂരത്തോളം കേട്ടതായി ദൃക്സാക്ഷികൾ പറയുന്നു.

ആക്രമണത്തെത്തുടർന്ന് സ്റ്റേഷനിൽ പരിഭ്രാന്തി പടരുകയും ആളുകൾ ചിതറിയോടുകയും ചെയ്തു. വിവരമറിഞ്ഞ ഉടൻ തന്നെ പൊലീസ്, സുരക്ഷാ സേന, ആംബുലൻസുകൾ എന്നിവർ സ്ഥലത്തെത്തി രക്ഷാപ്രവർത്തനം ആരംഭിച്ചു. പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ചു.

സ്ഫോടനത്തിൽ കൊല്ലപ്പെട്ടവരുടെ എണ്ണം ഇനിയും ഉയർന്നേക്കാമെന്ന് ആശുപത്രി വൃത്തങ്ങൾ സൂചിപ്പിച്ചു. നിരവധി പേരുടെ നില ഗുരുതരമായതിനാൽ മരണസംഖ്യ വർധിക്കാൻ സാധ്യതയുണ്ട്. സംഭവം നടന്ന ഉടൻ തന്നെ റെയിൽവേ സ്റ്റേഷനും പരിസരവും സുരക്ഷാ സേന വളഞ്ഞു.

സ്ഫോടനത്തിന് പിന്നിൽ പ്രവർത്തിച്ചവർക്കായുള്ള തിരച്ചിൽ പോലീസ് ശക്തമാക്കിയിട്ടുണ്ട്. ഒരു തീവ്രവാദി സംഘടനയും ഇതുവരെ ആക്രമണത്തിന്റെ ഉത്തരവാദിത്തം ഏറ്റെടുത്തിട്ടില്ല. മേഖലയിൽ അതീവ ജാഗ്രത പ്രഖ്യാപിച്ചിരിക്കുകയാണ്. ക്വറ്റയിലെ ആശുപത്രികളിൽ അടിയന്തര ചികിത്സാ സൗകര്യങ്ങൾ ഒരുക്കാൻ അധികൃതർ നിർദേശം നൽകി.