ഉത്തര - ദക്ഷിണ കൊറിയയിൽ അതിരൂക്ഷ ഉഷ്ണതരം​ഗം; റെക്കോഡ് താപനില

സിയോൾ : കൊറിയൻ ഉപദ്വീപിൽ റെക്കോഡ് ഉഷ്ണതരം​ഗം പടരുന്നതായി റിപ്പോർട്ട്. ദക്ഷിണ കൊറിയയിലും ഉത്തര കൊറിയയിലും താപനില കുതിച്ചുയരുകയാണ്. കൊടും ചൂട് ദൈനംദിന ജീവിതത്തെ ദുസഹമാക്കുന്ന സ്ഥിതിയാണുള്ളത്. അസഹനീയ ചൂട് കാരണം ജനങ്ങൾ കൂളിം​ഗ് ഷെൽട്ടറുകളിലും ബീച്ചുകളിലും വാട്ടർ പാർക്കുകളിലും അഭയം തേടുകയാണ്.

ദക്ഷിണ കൊറിയയുടെ തെക്കുകിഴക്കൻ ഭാ​ഗത്താണ് അതിശക്തമായ താപനില അനുഭവപ്പെടുന്നത്. തിങ്കളാഴ്ചയോടെ അതികഠിനമായ ചൂട് സിയോൾ മെട്രോപൊളിറ്റൻ പ്രദേശത്തേക്കും മറ്റു പടിഞ്ഞാറൻ ഭാ​ഗത്തേക്കും വ്യാപിക്കുമെന്ന് അധികൃതർ പറഞ്ഞു. രാജ്യത്തിന്റെ ചില ഭാ​ഗങ്ങളിൽ താപനില 40 ഡി​ഗ്രി സെൽഷ്യസിലേക്ക് അടുക്കുകയാണ്. പ്യോങ്സാങ്ങിൽ തുടർച്ചയായ അഞ്ചാമത്തെ രാത്രിയും കടുത്ത ഉഷ്ണമാണ് അനുഭവപ്പെടുന്നത്. ഞായറാഴ്ച യാങ്സാനിൽ താപനില 42.5 ഡി​ഗ്രി സെൽഷ്യസെത്തി. 122 വർഷത്തിനിടെ രേഖപ്പെടുത്തിയ ഏറ്റവും ഉയർന്ന താപനിലയാണിത്.

ഈ ആഴ്ച ദക്ഷിണ കൊറിയയുടെ പടിഞ്ഞാറൻ പ്രദേശങ്ങളിൽ താപനില ഇനിയും ഉയരുമെന്ന് കാലാവസ്ഥാ ഏജൻസി മുന്നറിയിപ്പ് നൽകി. രാത്രികളിൽ ഉഷ്ണതരം​​ഗം തുടരാൻ സാധ്യതയുണ്ടെന്നും അറിയിച്ചിട്ടുണ്ട്. മെയ് പകുതി മുതൽ ഇതുവരെ ഉഷ്ണതരം​ഗത്തെ തുടർന്ന് 14 പേർ മരിച്ചതായും 1889 പേർക്ക് ചൂട് കാരണമുള്ള അസുഖങ്ങൾ പിടിപ്പെട്ടതായും കൊറിയ ഡിസീസ് കൺ​ട്രോൾ ആൻഡ് പ്രിവൻഷൻ ഏജൻസി ഞായറാഴ്ച പുറത്തുവിട്ട കണക്കുകൾ വ്യക്തമാക്കുന്നു.

കൊറിയ ബേസ്ബോൾ ഓർ​ഗനൈസേഷൻ ബുസാനിലും ഷാങ്‌വോണിലും നടത്താനിരുന്ന മത്സരങ്ങൾ റദ്ദാക്കി. ബീച്ചുകൾ, വാട്ടർ പാർക്കുകൾ, നദീതീര വിനോദ മേഖലകൾ എന്നിവിടങ്ങളിൽ തിരക്കേറുകയാണെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു.

ഉത്തരകൊറിയയും സമാനമായ സാഹചര്യത്തിലൂടെയാണ് കടന്നു പോകുന്നത്. രാജ്യത്തിന്റെ ഭൂരിഭാ​​ഗത്തും അതിശക്തമായ താപനില തുടരുകയാണ്. ഉഷ്ണതരം​ഗ മുന്നറിയിപ്പ് ഈ ആഴ്ച മുഴുവൻ നിലനിൽക്കുമെന്ന് മാധ്യമങ്ങൾ റിപ്പോർട്ട് ചെയ്യുന്നു. അതികഠിനമായ ചൂടിനെ മറികടക്കാൻ ജൂലൈയിൽ പതിനായിരക്കണക്കിന് ആളുകളാണ് വോൺസാൻ കൽമ തീരദേശത്തെ ടൂറിസ്റ്റ് സോൺ സന്ദർശിച്ചതെന്നും റിപ്പോർട്ടുണ്ട്.