തകർന്നടിഞ്ഞ് നേപ്പാൾ , ഉയര്‍ത്തെഴുന്നേല്‍ക്കാന്‍ കടമ്പകളേറെ

കാഠ്മണ്ഡു: പ്രളയത്തിൽ തകർന്നടിഞ്ഞ നേപ്പാൾ എന്ന് പൂർണ്ണമായി സാധാരണ ജീവിതത്തിലേക്ക് തിരിച്ചെത്തുമെന്നത് വലിയൊരു ചോദ്യചിഹ്നമായി നില്‍ക്കുന്നു. ദുരന്ത നിവാരണ വിദഗ്ധരുടെയും അടിസ്ഥാന സൗകര്യ വികസന ഏജൻസികളുടെയും കണക്കുകൂട്ടൽ അനുസരിച്ച്, രാജ്യം പൂർണ്ണമായി പഴയ രൂപത്തിലാകാൻ കുറഞ്ഞത് 3 മുതൽ 5 വർഷം വരെ സമയമെടുത്തേക്കാം.

ബുധൻ രാവിലെ 8.37നാണ്‌ ഹിമാനി ഇടിഞ്ഞത്‌. തുടർന്ന്‌ കുത്തിയൊലിച്ച പ്രളയജലം ചൈനയുടെ ഗൈറോങ്‌ അതിർത്തിയിലും നേപ്പാളിലെ ആറ്‌ അതിർത്തി ജില്ലകളിലും വൻനാശം വിതച്ചു. നേപ്പാൾ അതിർത്തിയിൽനിന്ന്‌ 20 കിലോ മീറ്റർ അകലെ സമുദ്രനിരപ്പിൽനിന്ന്‌ 5200 മീറ്റർ ഉയരത്തിലുള്ള ഹിമാനിയുടെ ഭാഗം 1200 മീറ്റർ താഴ്‌ചയിലേക്ക് പതിക്കുകയായിരുന്നു. പാറകളും മരങ്ങളുമെല്ലാം അടർത്തി വന്ന മഞ്ഞുപാളി ടിബറ്റിലെ ലെൻഡെ നദിയിലേക്ക് എത്തിയതോടെ നദിയുടെ ഒഴുക്ക് അൽപ്പനേരം നിലച്ചു. ഇ‍ൗ ‘തടയണ’ പൊടുന്നനെ തകരുകയും നേപ്പാൾ ഭാഗത്തേക്ക്‌ വൻ ജലപ്രവാഹവുമുണ്ടായി.പിന്നീട് ദുരിതം ഭയാനകമായി നേപ്പാളിനെ വിഴുങ്ങി.

അടിയന്തര രക്ഷാപ്രവർത്തനവും താൽക്കാലിക പുനരധിവാസവും അടുത്ത 6 മുതൽ 12 മാസത്തിനുള്ളിൽ പൂർത്തിയാക്കാൻ സാധിച്ചേക്കുമെങ്കിലും, തകർന്നടിഞ്ഞ പാലങ്ങൾ, ജലവൈദ്യുത പദ്ധതികൾ, ഗതാഗത ശൃംഖലകൾ, ടൂറിസം മേഖല എന്നിവ പൂർവ്വസ്ഥിതിയിലാക്കാൻ വർഷങ്ങളുടെ പ്രയത്നം ആവശ്യമാണ്.നേപ്പാളിലെ ദുർബലമായ ഹിമാലയൻ മലനിരകൾ പുനർനിർമാണ പ്രവർത്തനങ്ങൾക്ക് വലിയ തടസ്സമാണ്. പ്രളയത്തിലും ഭൂചലനത്തിലും മണ്ണിടിച്ചിൽ രൂക്ഷമായ പ്രദേശങ്ങളിൽ വീണ്ടും നിർമാണ പ്രവർത്തനങ്ങൾ നടത്തുന്നത് വലിയ അപകടസാധ്യത ഉയർത്തുന്നു. കൂടാതെ, ചൈന-തിബറ്റ് അതിർത്തിയിലെ അണക്കെട്ടുകളുടെ തകർച്ചയും മഞ്ഞുമല തടാകങ്ങൾ പൊട്ടുന്നതും വീണ്ടും പ്രളയഭീഷണി സൃഷ്ടിക്കുന്നുണ്ട്.

രാജ്യത്തെ തലസ്ഥാനമായ കാഠ്മണ്ഡുവിനെ മറ്റു ജില്ലകളുമായും അന്താരാഷ്ട്ര അതിർത്തികളുമായും ബന്ധിപ്പിക്കുന്ന പ്രധാന ഹൈവേകളും നിരവധി പാലങ്ങളും പൂർണ്ണമായി തകർന്നു. ത്രിശൂലി മേഖലയിലെ ജലവൈദ്യുത പദ്ധതികൾ തകർന്നത് രാജ്യത്ത് വലിയ ഊർജ്ജ പ്രതിസന്ധിക്കും ശുദ്ധജല ക്ഷാമത്തിനും കാരണമായിട്ടുണ്ട്. ഇവ പുനർനിർമിക്കുന്നത് ഭീമമായ തുകയും സമയവും കവരുന്ന ദൗത്യമാണ്.

നേപ്പാൾ സമ്പദ്‌വ്യവസ്ഥയുടെ നട്ടെല്ല് ടൂറിസമാണ്. പ്രളയത്തിൽ അനവധി വിദേശ വിനോദസഞ്ചാരികൾ മരിക്കുകയും കാണാതാവുകയും ചെയ്തത് വിദേശ സഞ്ചാരികൾക്കിടയിൽ വലിയ ഭീതി സൃഷ്ടിച്ചിട്ടുണ്ട്. ഹിമാലയൻ ട്രെക്കിംഗ് പാതകൾ നശിച്ചതും ഹോട്ടലുകൾ തകർന്നതും കാരണം ടൂറിസം മേഖല സാധാരണ നിലയിലാകാൻ വർഷങ്ങളെടുക്കും. ഇത് രാജ്യത്തിന്റെ വിദേശനാണ്യ വരുമാനത്തെ കഠിനമായി ബാധിക്കും.പുനർനിർമാണത്തിനായി കോടിക്കണക്കിന് ഡോളർ നേപ്പാളിന് ആവശ്യമാണ്. നിലവിലെ ആഗോള സാമ്പത്തിക സ്ഥിതിയും രാജ്യത്തെ സാമ്പത്തിക മാന്ദ്യവും കണക്കിലെടുക്കുമ്പോൾ ഇത്രയും വലിയ തുക കണ്ടെത്തുന്നത് എളുപ്പമല്ല. വിദേശ വായ്പകളെയും അന്താരാഷ്ട്ര ധനകാര്യ സ്ഥാപനങ്ങളെയും അതിയായി ആശ്രയിക്കേണ്ടി വരുന്നത് രാജ്യത്തെ കടക്കെണിയിലാക്കാനും സാധ്യതയുണ്ട്.

‍40 കിലോമീറ്റർ റോഡ്‌ ഒലിച്ചുപോയി. 19 പാലങ്ങൾ തകർന്നു. 13 ജലവൈദ്യുതി പദ്ധതികൾക്ക്‌ നാശമുണ്ടായി. ഇരുന്നൂറിലേറെ ട്രക്കുകളടക്കം നിരവധി വാഹനങ്ങൾ ഒഴുകിപ്പോയി. റോഡുകളും പാലങ്ങളും തകർന്നതിനാൽ ദുരന്തമുഖത്തെത്താൻ രക്ഷാപ്രവർത്തകർ പ്രയാസപ്പെടുന്നു.