print edition ഇസ്രയേൽ വിദേശ മന്ത്രി അടുത്തയാഴ്‌ച ഇന്ത്യയിൽ

ജറുസലേം: ഗാസയിൽ സമാധാനം തകർത്ത്‌ ആക്രമണം തുടരുന്നതിനിടെ ഇസ്രയേൽ വിദേശമന്ത്രി ഗിദയോൻ സാർ അടുത്തയാഴ്ച ഇന്ത്യ സന്ദർശിക്കും. നവംബർ നാല്‌, അഞ്ച്‌ തീയതികളിൽ ന്യൂഡൽഹിയിലെത്തുന്ന മന്ത്രി പ്രധാനമന്ത്രി നരേന്ദ്ര മോദി, വിദേശമന്ത്രി എസ് ജയ്ശങ്കർ തുടങ്ങിയവരുമായി കൂടിക്കാഴ്ച നടത്തും.

സെപ്തംബറിൽ ധനമന്ത്രി ബെസലേൽ സ്മോട്രിച്ചിന്റെ സന്ദർശനവേളയിൽ ഇന്ത്യയും ഇസ്രയേലും ഉഭയകക്ഷി നിക്ഷേപ ഉടമ്പടിയിൽ (ബിഐടി) ഒപ്പുവച്ചിരുന്നു. ഇതിന്റെ തുടർചർച്ചകളും നടക്കും. വിവിധ മേഖലകളിൽ വിദഗ്‌ധരായ തൊഴിലാളികളുടെ ക്ഷാമം ഇസ്രയേലിലുണ്ട്‌. ഇന്ത്യയിൽനിന്ന്‌ കൂടുതൽപേരെ ആകർഷിക്കാനും നീക്കമുണ്ടാകും. നിലവിൽ 40,000 ഇന്ത്യക്കാർ ഇസ്രയേലിൽ ജോലിചെയ്യുന്നുണ്ട്‌.