മരണക്കെണിയൊരുക്കി മറ്റപ്പള്ളി വളവ്

ചിറ്റാരിക്കൽ

മലയോര ഹൈവേയുടെ ഭാഗമായ കാറ്റാംകവല -മാലോം റോഡിലെ ഇറക്കവും വളവുകളും യാത്രക്കാർക്ക് മരണക്കെണിയാകുന്നു. കാറ്റാംകവല മുതൽ കുറ്റിത്താന്നി വരെയുള്ള രണ്ട് കിലോമീറ്റർ ദൂരം അപകടങ്ങൾ പതിവ്‌ കാഴ്ചയാണ്. ചെങ്കുത്തായ ഇറക്കവും അടിക്കടിയുള്ള വളവുകളുമാണ് ഇവിടെ അപകടക്കെണിയൊരുക്കുന്നത്‌. ശനിയാഴ്ച മറ്റപ്പള്ളി വളവിൽ അയ്യപ്പഭക്തർ സഞ്ചരിച്ച ബസ് മറിഞ്ഞ് മൈസൂരു സ്വദേശി ഹരീഷ് മരിച്ചതോടെ ഇവിടെ അപകടത്തിൽ മരിച്ചവരുടെ എണ്ണം പത്തായി. മൂന്ന് വർഷം മുന്പുണ്ടായ അപകടത്തിൽ പടന്ന സ്വദേശി ചിന്നസാമി മരിക്കുകയും രണ്ട് പേർക്ക് ഗുരുതര പരിക്കേൽക്കുകയുംചെയ്‌തു. ഇതിന് സമീപമാണ് ഏഴ് വർഷം മുമ്പ് കുഴൽക്കിണർ കുഴിക്കുന്ന വാഹനം മറിഞ്ഞ് ഇതര സംസ്ഥാന തൊഴിലാളികളായ അഞ്ച് പേർ മരിച്ചത്. ബൈക്ക് മറിഞ്ഞ് രണ്ട് പേർ മരിച്ചതും ഇവിടെയാണ്. ഈ വർഷം ഏപ്രിലിലാണ് അമ്മയും കുഞ്ഞും സഞ്ചരിച്ച സ്കൂട്ടർ മറിഞ്ഞ് മൂന്നര വയസുള്ള സെലിൻ മേരി എന്ന കുഞ്ഞ് മരിച്ചത്. ഏതാണ്ട് ഏഴ് വർഷത്തിനിടെ ഇവിടെ നടന്ന അപകടങ്ങൾക്ക് കണക്കില്ല. റോഡ്റോളർ, ജീപ്പ്, കാർ, ഓട്ടോ, ബൈക്ക്‌ തുടങ്ങിയവ അപകടത്തിൽപെട്ടു. പലരും തലനാരിഴക്കാണ് രക്ഷപ്പെട്ടത്. പലരും പരിക്കേറ്റ് ചികിത്സയിലുമാണ്‌. മലയോര ഹൈവേയുടെ ബളാൽ, -വെസ്റ്റ് എളേരി, -ഈസ്റ്റ് എളേരി പഞ്ചായത്തുകളെ ബന്ധിപ്പിക്കുന്ന റോഡാണിത്. ദേശീയപാതയുടെ തിരക്കിൽനിന്നും രക്ഷപ്പെടാൻ ദീർഘദൂര യാത്രക്കാരെല്ലാം ഗ്രാമീണതയുടെ കുളിർമതേടി ഇതുവഴി യാത്രചെയ്യുന്നുണ്ട്. ഓരോ വാഹനവും കടന്നു പോകുന്പോൾ സ്ഥലവാസികൾ ഭീതിയോടെയാണ് കഴിയുന്നത്. കയറ്റവും വളവും കുറച്ച് നവീകരണം നടത്തിയില്ലെങ്കിൽ ഇനിയും അപകടം തുടർക്കഥയാകുമെന്ന് നാട്ടുകാർ പറയുന്നു. നിരവധി കർണാടക വാഹനങ്ങൾ ഇതുവഴി കടന്നുപോകുന്നുണ്ട്. ഇംഗ്ലീഷ്, കന്നഡ, മലയാളം ഭാഷകളിലായി മുന്നറിയിപ്പ് ബോർഡുകൾ ഇരുവശത്തും എഴുതി വയ്‌ക്കുന്നത് ഒരു പരിധിവരെ പരിഹാരമാവും. റോഡിൽ ഹംബുകൾ നിർമിക്കുകയും ശബരിമല സീസൺ കഴിയുംവരെ പൊലീസ് സേവനം ഉണ്ടാവുന്നതും നല്ലതാണെന്ന് നാട്ടുകാർ പറയുന്നു. അല്ലെങ്കിൽ മുതുമല ഗുണ്ഡൽപേട്ട് റോഡിൽ ഉള്ളതുപോലെ പഞ്ചായത്തുകളുടെ സഹകരണത്തോടെ ഒരു ചെക്ക്‌പോസ്റ്റ് ഒരുക്കി വാഹനങ്ങൾ വരുമ്പോൾ അവിടെ നിർത്തിച്ച് പത്തു മിനിറ്റ് വിശ്രമിപ്പിച്ച് വേണ്ട നിർദേശങ്ങൾ നൽകി യാത്രയാക്കുന്ന സംവിധാനം ഒരുക്കിയാലും നല്ലതാണെന്ന് യാത്രക്കാരും പറയുന്നു.