ദിത്വാ ചുഴലിക്കാറ്റ്; കുടുങ്ങിക്കിടക്കുന്ന മലയാളികളെ സഹായിക്കാൻ ഇടപെട്ട് മുഖ്യമന്ത്രി കത്ത് നൽകി

തിരുവനന്തപുരം: ദിത്വാ ചുഴലിക്കാറ്റിന്റെ കെടുതികളിൽ പെട്ട് കുടുങ്ങിക്കിടക്കുന്ന മലയാളികൾ ഉൾപ്പടെയുള്ളവരെ സഹായിക്കാനിടപെട്ട് മുഖ്യമന്ത്രി പിണറായി വിജയൻ. കേന്ദ്ര വിദേശകാര്യ മന്ത്രി എസ് ജയ്ശങ്കറിന് കത്ത് നൽകി. കൊളംബോ എയർപോർട്ടിൽ അറുപതോളം മലയാളികൾ കുടുങ്ങിക്കിടക്കുകയാണെന്ന് മുഖ്യമന്ത്രി കത്തിൽ പറഞ്ഞു.

സൗദിയിൽ നിന്ന് കേരളത്തിലേക്ക് പുറപ്പെട്ട മലയാളികളടക്കമുള്ളവർ ചുഴലിക്കാറ്റിൽ വിമാനത്താവളത്തിൽ കുടുങ്ങിപ്പോയതായി റിപ്പോർട്ടുകൾ വന്നതിന് പിന്നാലെയാണ് ഇടപെടൽ.

ശ്രീലങ്കയിൽ കുടുങ്ങിയ ഇന്ത്യന്‍ പൗരന്മാര്‍ക്കായി കൊളംബോ ബണ്ഡാരനായക അന്താരാഷ്ട്ര വിമാനത്താവളത്തിൽ ഇന്ത്യന്‍ ഹൈക്കമീഷന്‍ ഒരുക്കിയ അടിയന്തര ഹെൽപ്പ് ഡെസ്‌കില്‍ ബന്ധപ്പെടാമെന്ന്‌ നോർക്ക അറിയിച്ചിരുന്നു. ശ്രീലങ്കയിലെ ഏതെങ്കിലും വിമാനത്താവളത്തിലോ മറ്റേതെങ്കിലും ഭാഗത്തോ സഹായം ആവശ്യമുള്ള ഇന്ത്യന്‍ പൗരന്മാര്‍ക്ക് സഹായത്തിനായി +94 773727832 (വാട്ട്സ്ആപ്പിലും ലഭ്യമാണ്) എന്ന നമ്പരിലും ബന്ധപ്പെടാം. കൊളംബോ വിമാനത്താവളത്തില്‍ കുടുങ്ങിയ ഇന്ത്യന്‍ യാത്രക്കാര്‍ക്ക് ഭക്ഷണവും കുടിവെള്ളവും ഉള്‍പ്പെടെ അവശ്യസഹായങ്ങൾ ഹൈക്കമീഷന്‍ നൽകുന്നുണ്ട്.

രാജ്യത്ത് സ്ഥിതി​ഗതികൾ മോശമായി തുടരുന്ന സാഹചര്യത്തിൽ പ്രസിഡന്റ് അനുര കുമാര ദിസനായകേ അടിയന്തരാവസ്ഥ പ്രഖ്യാപിച്ചിട്ടുണ്ട്. വെള്ളിയാഴ്ച ചേർന്ന സർവകക്ഷി യോഗത്തിന് ശേഷമാണ് തീരുമാനം. ഡോക്ടർമാരുടെ ട്രേഡ് യൂണിയൻ ദിസനായകെയ്ക്ക് അയച്ച കത്തിൽ അടിയന്തരാവസ്ഥ ഏർപ്പെടുത്തണമെന്ന് ആവശ്യപ്പെട്ടിരുന്നു. ദുരിതാശ്വാസ പ്രവർത്തനങ്ങൾ ഏകോപിപ്പിക്കാൻ നടപടി സഹായകമാകുമെന്നാണ് കരുതുന്നത്.