കൂട്ടക്കുരുതിക്ക് ശേഷം ​ഗാസയെ റിയൽ എസ്റ്റേറ്റ് ആക്കി വിൽക്കും; ബിസിനസ് പ്ലാൻ ട്രംപിന്റെ മേശപ്പുറത്തെന്ന് ഇസ്രയേൽ മന്ത്രി

ടെൽ അവീവ്: പലസ്തീൻ ജനതയെ കൂട്ടക്കുരുതി നടത്തി ​ഗാസ മുനമ്പിനെ റിയൽ എസ്റ്റേറ്റ് ഭൂമിയാക്കാൻ ഇസ്രയേൽ പദ്ധതി. യുദ്ധത്തിന് ശേഷം മേഖല എങ്ങനെ വിഭജിക്കണം എന്നത് സംബന്ധിച്ച് അമേരിക്കയുമായി ചർച്ച നടക്കുകയാണെന്ന് തീവ്രവലതുപക്ഷക്കാരനായ ഇസ്രയേൽ ധനമന്ത്രി ബെസലേൽ സ്‌മോട്രിച്ച്‌ വെളിപ്പെടുത്തി. ​

ഗാസ സംബന്ധിച്ച ബിസിനസ് പ്ലാൻ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ മേശപ്പുറത്താണെന്നും സ്‌മോട്രിച്ച്‌ ടെൽ അവീവിൽ നടന്ന യോ​ഗത്തിൽ പറഞ്ഞു. തകർക്കുന്ന ഘട്ടം ഞങ്ങൾ പൂർത്തിയാക്കി, ഇനി പുതിയത് നിർമിക്കുകയാണ്- സ്‌മോട്രിച്ച്‌ പറഞ്ഞു.

​

അതേസമയം, ഇസ്രയേൽ ആക്രമണത്തിൽ ​ഗാസയിലെ ആശുപത്രികൾ തകർന്ന് തരിപ്പണമാകാനുള്ള വലിയ സാധ്യതയിലാണെന്ന് ലോ​കാരോ​ഗ്യ സംഘടന മുന്നറിയിപ്പ് നൽകി. മാനസിക സമ്മർ‌ദ്ദത്തിലായ മനുഷ്യർക്ക് ഒരു തരത്തിലും അന്തസോടെ നിലനിൽക്കാൻ സാധിക്കാത്ത ചുരുങ്ങിയ ഇടത്തേക്കാണ് ആളുകൾ മാറിക്കൊണ്ടിരിക്കുന്നത്. ഇസ്രയേൽ വിമാനങ്ങളും ടാങ്കുകളും ​ഗാസയെ വട്ടമിട്ട് പറക്കുകയാണ്. ആളുകൾ ഭയചകിതരായി നിരനിരയായി പലായനം തുടരുന്നു. ഇന്റർ‌നെറ്റ് ഫോൺ ബന്ധം എന്നിവ പൂർണായി വിഛേദിച്ചു. ന​ഗരത്തിന്റെ ഉൾപ്രദേശത്ത് കേന്ദ്രസ്ഥാനത്തും വടക്ക് പ്രദേശത്തും വലിയ ആക്രമണം നടത്താനാണ് പദ്ധതി.