ഗാസയിൽ വീണ്ടും ഇസ്രായേൽ ആക്രമണം; ഗര്‍ഭിണിയും മകനും ഉൾപ്പെടെ 12 മരണം

നുസൈറത്ത്: ഞായറാഴ്ച ഗാസയിലുണ്ടായ ഇസ്രായേൽ വ്യോമാക്രമണങ്ങളിൽ എട്ട് പൊലീസ് ഉദ്യോഗസ്ഥരും ഒരു ഗർഭിണിയും രണ്ട് ആൺകുട്ടികളും ഉൾപ്പെടെ 12 ഫലസ്തീനികൾ കൊല്ലപ്പെട്ടു.

മധ്യ ഗാസയിലെ നുസൈറത്തിലുള്ള ഒരു വീടിന് നേരെ നടന്ന ആക്രമണത്തിൽ ദമ്പതികളും അവരുടെ 10 വയസ്സുള്ള മകനും കൊല്ലപ്പെട്ടു. കൊല്ലപ്പെട്ട സ്ത്രീ ഇരട്ടക്കുട്ടികളെ ഗർഭം ധരിച്ചിരിക്കുകയായിരുന്നുവെന്ന് അൽ-അഖ്സ മാർട്ടിയേഴ്സ് ആശുപത്രി അറിയിച്ചു. അയൽവാസിയായ 15 വയസ്സുകാരനാണ് കൊല്ലപ്പെട്ട നാലാമത്തെയാൾ. വീടിന് നേരെ മിസൈൽ തൊടുക്കുകയായിരുന്നു എന്നാണ് റിപ്പോര്‍ടുകൾ.

സവായ്ദ പട്ടണത്തിന്റെ കവാടത്തിൽ വെച്ച് ഒരു പോലീസ് വാഹനത്തിന് നേരെ നടന്ന ആക്രമണത്തിൽ എട്ട് പോലീസ് ഉദ്യോഗസ്ഥർ കൊല്ലപ്പെട്ടു. മധ്യ ഗാസയിലെ മുതിർന്ന പോലീസ് ഉദ്യോഗസ്ഥനായ കേണൽ ഇയാദ് അബ് യൂസഫും കൊല്ലപ്പെട്ടവരിൽ ഉൾപ്പെടുന്നു. 14 പേർക്ക് പരിക്കേറ്റതായും റിപ്പോർട്ടുണ്ട്.

തങ്ങളുടെ സൈന്യത്തിന് നേരെ വെടിയുതിർത്ത ഹമാസ് പോരാളിയെ ലക്ഷ്യം വെച്ചാണ് ആക്രമണം നടത്തിയതെന്നാണ് ഇസ്രായേൽ സൈന്യം അവകാശപ്പെടുന്നത്.

വെടിനിർത്തലിനിടയിലും തുടരുന്ന മരണങ്ങൾ

രണ്ട് വർഷത്തിലേറെ നീണ്ട യുദ്ധം അവസാനിപ്പിക്കാൻ ലക്ഷ്യമിട്ടുള്ള വെടിനിർത്തൽ കരാർ നിലവിലുണ്ടെങ്കിലും ഗാസയിൽ ഇസ്രയേൽ നടത്തുന്ന കൊലപാതകങ്ങൾ തുടരുകയാണ്.വെടിനിർത്തലിന് ശേഷം ഇസ്രായേൽ നടത്തിയ ആക്രമണങ്ങളിൽ 650-ലധികം ഫലസ്തീനികൾ കൊല്ലപ്പെട്ടതായി ഗാസ ആരോഗ്യ മന്ത്രാലയം അറിയിച്ചു. ഇതിൽ പകുതിയോളം പേർ സ്ത്രീകളും കുട്ടികളുമാണ്.

2023 ഒക്ടോബർ 7-ന് ആരംഭിച്ച യുദ്ധത്തിൽ ഇതുവരെ 72,200-ലധികം ഫലസ്തീനികൾ കൊല്ലപ്പെട്ടിട്ടുണ്ട്. ഹമാസ് നടത്തിയ ആക്രമണത്തിൽ 1,200 ഇസ്രായേലികൾ കൊല്ലപ്പെടുകയും 250 പേരെ തടവിലാക്കുകയും ചെയ്തിരുന്നു. വെടിനിർത്തലിന് ശേഷം നാല് ഇസ്രായേൽ സൈനികരും കൊല്ലപ്പെട്ടിട്ടുണ്ട്.

റഫ അതിർത്തി വീണ്ടും തുറക്കുന്നു

രണ്ടാഴ്ചത്തെ ഇടവേളയ്ക്ക് ശേഷം ഈജിപ്തുമായുള്ള റഫ അതിർത്തി ബുധനാഴ്ച മുതൽ വീണ്ടും തുറക്കുമെന്ന് ഇസ്രായേൽ പ്രഖ്യാപിച്ചു. യാത്രക്കാർക്ക് പരിമിതമായ രീതിയിൽ അതിർത്തി കടക്കാം, എന്നാൽ ചരക്കുനീക്കം അനുവദിക്കില്ലെന്ന് ഇസ്രായേൽ സൈനിക വിഭാഗമായ COGAT അറിയിച്ചു. യുദ്ധത്തിൽ പരിക്കേറ്റ 20,000-ത്തോളം പേർക്ക് അടിയന്തര ചികിത്സ ആവശ്യമാണെങ്കിലും, വളരെ കുറച്ചുപേർക്ക് മാത്രമേ ഇതുവരെ ചികിത്സയ്ക്കായി അതിർത്തി കടക്കാൻ അനുമതി ലഭിച്ചിട്ടുള്ളൂ.

ഫെബ്രുവരി 28-ന് ഇസ്രായേലും അമേരിക്കയും ഇറാനെതിരെ നടത്തിയ ആക്രമണത്തെത്തുടർന്ന് മേഖലയിൽ യുദ്ധം വ്യാപിച്ച സാഹചര്യത്തിലാണ് റഫ അതിർത്തി വീണ്ടും അടച്ചത്.