ഇറാനിയൻ ചലച്ചിത്രകാരൻ ജാഫർ പനാഹിയ്ക്ക് ഒരു വർഷം തടവ്

തെഹ്റാൻ: ഇറാനിയൻ ചലച്ചിത്രകാരൻ ജാഫർ പനാഹിയ്ക്ക് ഒരു വർഷം തടവ്. രാജ്യത്തിനതിരെ ദുഷ്പ്രചാരണം നടത്തിയെന്ന കുറ്റത്തിനാണ് ശിക്ഷ. യാത്രാ വിലക്കും ഏർപ്പെടുത്തിയിട്ടുണ്ട്. നിലവിൽ പനാഹി മറ്റൊരു രാജ്യത്താണ്. സംവിധായകന്റെ അഭാവത്തിലാണ് ശിക്ഷ വിധിച്ചത്.

ഭരണകൂടത്തിനെതിരായ പ്രചാരണം നടത്തിയതിന് തെഹ്‌റാൻ റെവല്യൂഷണറി കോടതിയുടെ ബ്രാഞ്ച് 26 ആണ് ശിക്ഷ വിധിച്ചത്. ഒരു വർഷം തടവും, രണ്ട് വർഷം യാത്രാ വിലക്കും, രാഷ്ട്രീയ, സാമൂഹിക ഗ്രൂപ്പുകളിലെ അംഗത്വത്തിന് വിലക്കുമാണ് ശിക്ഷ. ശിക്ഷയെക്കുറിച്ച് പനാഹി പ്രതികരിച്ചിട്ടില്ല. ഇറാനിലേക്ക് മടങ്ങാൻ പദ്ധതിയിട്ടിട്ടുണ്ടോ എന്നതിനെക്കുറിച്ച് വിവരം ലഭ്യമായിട്ടില്ല.

ഈ വർഷത്തെ കാൻ ചലച്ചിത്രോത്സവത്തിൽ പാം ഡി ഓർ പുരസ്‌കാരം നേടിയത് പനാഹിയുടെ 'ഇറ്റ് വാസ് ജസ്റ്റ് ആൻ ആക്സിഡന്റ്' എന്ന ചിത്രമായിരുന്നു. ഇറാനിൽ ജീവൻ പണയം വച്ച് ചലച്ചിത്ര നിർമാണം നടത്തുന്ന സഹ ചലച്ചിത്ര സംവിധായകർക്ക് പനാഹി പുരസ്കാരം സമർപ്പിച്ചിരുന്നു.

ഇറാനിലെ ഇസ്ലാമിക ഭരണകൂടത്തിനെതിരെ രം​ഗത്തിറങ്ങാൻ പുരസ്കാര സ്വീകരണ പ്രസം​ഗത്തിൽ ആഹ്വാനം ചെയ്തിരുന്നു. തിരക്കഥയ്ക്കും സംവിധാനത്തിനുമുള്ള ന്യൂയോർക്കിലെ ​ഗോതം പുരസ്കാരവും 'ഇറ്റ് വാസ് ജസ്റ്റ് ആൻ ആക്സിഡന്റ്' ചിത്രത്തിന് ലഭിച്ചിരുന്നു.