ഫ്ലൈദുബായ് ആക്രമണം: കോ-പൈലറ്റിനെ തിരിച്ചറിഞ്ഞു; ഒമാൻ സ്വദേശി ഹമാം അൽ ഹമാമി

ദുബായ് : ഫ്ലൈദുബായ് വിമാനത്തിൽ ക്യാപ്റ്റനെ ആക്രമിക്കുകയും വിമാനം തകർക്കാൻ ശ്രമിക്കുകയും ചെയ്ത കോ-പൈലറ്റിനെ തിരിച്ചറിഞ്ഞു. ഒമാൻ പൗരനായ ഹമാം അൽ ഹമാമിയാണ് സംഭവത്തിലെ പ്രതിയെന്ന് അന്വേഷണസംഘം വെളിപ്പെടുത്തി. ദുബായിൽനിന്ന് ടെൽ അവീവിലേക്ക് പുറപ്പെട്ട ഫ്ലൈദുബായ് വിമാനത്തിൽ സെപ്റ്റംബർ 30നായിരുന്നു സംഭവം.

വിമാനത്തിന്റെ ക്യാപ്റ്റൻ സ്മിത് മച്ചാറിനെ കോ-പൈലറ്റ് ആക്രമിച്ചതിനെ തുടർന്ന് വിമാനം അതിവേഗം താഴേക്ക് പതിക്കുകയായിരുന്നു. വിമാനത്തിൽ 170ലേറെ യാത്രക്കാരുണ്ടായിരുന്നു. ക്യാപ്റ്റൻ കോക്പിറ്റ് വാതിൽ തുറന്നതോടെ യാത്രക്കാരെത്തി കോ-പൈലറ്റിനെ കീഴടക്കുകയായിരുന്നു. തുടർന്ന് വിമാനത്തിലുണ്ടായിരുന്ന രണ്ട് ഓഫ്-ഡ്യൂട്ടി പൈലറ്റുമാർ നിയന്ത്രണം ഏറ്റെടുത്ത് സൗദിയിൽ അടിയന്തരമായി ഇറക്കുകയായിരുന്നു.

പ്രതിയായ ഹമാമി, 2024ൽ ഒമാൻ എയറിൽ കോ-പൈലറ്റ് പരിശീലനം നടത്തിയിരുന്ന സമയത്ത് തീവ്രവാദ സ്വഭാവമുള്ള കാര്യങ്ങൾ കൈവശംവച്ചതായി കണ്ടെത്തിയിരുന്നു. തുടർന്ന് ഇയാളെ വിമാനയാത്രാ പരിശീലനത്തിൽനിന്ന് മാറ്റിയിരുന്നതായും അധികൃതർ പറഞ്ഞു. ഇതിന് പിന്നാലെ ഹമാമി ഒമാൻ എയർ വിട്ടു.

പിന്നീട് റോയൽ എയർ മറോക്കിൽ ജോലി ചെയ്യുകയും, 2026ൽ ഫ്ലൈദുബായിലും എത്തി. ഫ്ലൈദുബായിയിൽ ഏകദേശം എട്ട് മാസമായി ജോലി ചെയ്തുവരികയായിരുന്നുവെന്നാണ് അന്വേഷണവുമായി ഉദ്യോ​ഗസ്ഥർ വ്യക്തമാക്കുന്നത്. ഹമാമിയുടെ നിയമനവുമായി ബന്ധപ്പെട്ട സുരക്ഷാ പരിശോധനകളും പരിശോധിച്ചുവരികയാണ്.

അതേസമയം, ആക്രമണത്തിന് പിന്നിലെ ലക്ഷ്യം എന്തായിരുന്നുവെന്ന കാര്യത്തിൽ അന്തിമ നിഗമനത്തിലെത്തിയിട്ടില്ല. ഈ ആക്രമണത്തിന് ഭീകരവാദ ബന്ധമുണ്ടോയെന്നും മുൻകൂട്ടി ആസൂത്രണം ചെയ്തതാണോയെന്നും യുഎഇയിലെ അന്വേഷണ സംഘം തിരയുകയാണ്. ഹമാമിയുടെ സാമൂഹിക മാധ്യമ അക്കൗണ്ടുകളിലെ ചില ഉള്ളടക്കങ്ങളും അന്വേഷണ ഉദ്യോഗസ്ഥർ പരിശോധിക്കുന്നുണ്ട്. ആക്രമണത്തിനിടെ വിമാനം തകർത്ത് കളയാനായിരുന്നു ഹമാമിയുടെ ഉദ്ദേശ്യമെന്ന് ചില റിപ്പോർട്ടുകൾ പറയുന്നു. എന്നാൽ, ആക്രമണത്തിന്റെ കൃത്യമായ ഉദ്ദേശ്യവും സംഭവത്തിന്റെ പൂർണ സാഹചര്യങ്ങളും ഔദ്യോഗിക അന്വേഷണത്തിൽ സ്ഥിരീകരിക്കേണ്ടതുണ്ട്.