Deshabhimani

print edition സ്‌പെയിനിൽ തെരഞ്ഞെടുപ്പ് പ്രചാരണത്തിന് തുടക്കം

മാഡ്രിഡിന് സമീപമുള്ള അൽകോർകോണിൽ തെരഞ്ഞെടുപ്പ് പ്രചാരണ റാലിക്കെത്തിയ സ്‌പെയിൻ പ്രധാനമന്ത്രിയും സോഷ്യലിസ്റ്റ് പാർടി (പിഎസ്‌ഒഇ) നേതാവുമായ പെഡ്രോ സാഞ്ചസ് പ്രവർത്തകർക്കൊപ്പം ഫോട്ടോ: എഎഫ്‌പി

മാഡ്രിഡിന് സമീപമുള്ള അൽകോർകോണിൽ തെരഞ്ഞെടുപ്പ് പ്രചാരണ റാലിക്കെത്തിയ സ്‌പെയിൻ പ്രധാനമന്ത്രിയും സോഷ്യലിസ്റ്റ് പാർടി (പിഎസ്‌ഒഇ) നേതാവുമായ പെഡ്രോ സാഞ്ചസ് പ്രവർത്തകർക്കൊപ്പം ഫോട്ടോ: എഎഫ്‌പി

വെബ് ഡെസ്ക്

Published on Nov 16, 2026, 12:38 AM | 1 min read

മാഡ്രിഡ്: സ്‌പെയിനിൽ പൊതുതെരഞ്ഞെടുപ്പിനായുള്ള 16 ദിവസത്തെ ഔദ്യോഗിക പ്രചാരണത്തിന് തുടക്കമായി. അധോസഭയായ ‘കോൺഗ്രസ് ഓഫ് ഡെപ്യൂട്ടീസിലെ' 350 സീറ്റുകളിലേക്ക്‌ 29-നാണ്‌ വോട്ടെടുപ്പ്‌.


അടുത്തവർഷം നടക്കേണ്ടിയിരുന്ന തെരഞ്ഞെടുപ്പ്, ഭരണപ്രതിസന്ധിയെ തുടർന്ന് പ്രധാനമന്ത്രി പെഡ്രോ സാഞ്ചസ് നേരത്തെയാക്കുകയായിരുന്നു. ഭവന നിർമാണ ബില്ലുകളെക്കുറിച്ച്‌ പാർലമെന്റിലുണ്ടായ തർക്കങ്ങളും, മാഡ്രിഡിൽ കുടിയൊഴിപ്പിച്ചതിനെത്തുടർന്ന് വയോധിക മരിച്ച സംഭവവും പ്രക്ഷോഭങ്ങൾക്ക് വഴിവച്ചിരുന്നു. രൂക്ഷമായ ഭവനപ്രതിസന്ധി മുന്നണികളുടെ തെരഞ്ഞെടുപ്പ് പ്രചാരണത്തിലെ മുഖ്യവിഷയമാണ്‌.


സെവിയ്യയിൽ നാലായിരത്തോളം പേർ പങ്കെടുത്ത റാലിയിലൂടെയാണ് പ്രധാനമന്ത്രി പെഡ്രോ സാഞ്ചസ് പ്രചാരണത്തിന് തുടക്കംകുറിച്ചത്. പാർപ്പിടപ്രശ്നത്തിനും പൊതുസേവനങ്ങളുടെ സംരക്ഷണത്തിനുമാണ് സാഞ്ചസ് പ്രകടനപത്രികയിൽ മുൻഗണന നൽകുന്നത്. വലതുപക്ഷ കക്ഷിയായ ‘പോപ്പുലർ പാർട്ടി' പുരോഗതിയും പിന്തിരിപ്പൻ നയങ്ങളും തമ്മിലുള്ള പോരാട്ടമാണ് ഈ തെരഞ്ഞെടുപ്പെന്നും പുരോഗമന സ്പെയിൻ വിജയിക്കുമെന്നും സോഷ്യലിസ്റ്റ് വർക്കേഴ്സ് പാർടി നേതാവായ സാഞ്ചസ് പറഞ്ഞു.


പ്രധാന പ്രതിപക്ഷമായ മധ്യ-വലതുപക്ഷ പീപ്പിൾസ് പാർടിയെ നയിക്കുന്നത്‌ ആൽബെർട്ടോ നൂനെസ് ഫെയ്ഹുവാണ്‌. ഇടതുപക്ഷ സഖ്യമായ സുമർ പുനഃസംഘടിപ്പിച്ച് രൂപീകരിച്ച ഫ്രെന്റെ ആംപ്ലിയോ സ്ഥാനാർഥിയായി മുൻ ബാഴ്സലോണ മേയർ അഡ കൊളോ മത്സരിക്കുന്നു. മറ്റൊരു ഇടതുപക്ഷ പാർടിയായ പൊഡെമോസിന്റെ പ്രധാനമന്ത്രി സ്ഥാനാർഥിയായി മുൻ മന്ത്രി ഐറീൻ മോണ്ടെറോ രംഗത്തുണ്ട്‌.




Tags
deshabhimani section

Related News

View More
0 comments
Sort by

Deshabhimani
Home