ബു സുനൈദയും മോസയും ഇനി പങ്കാളികൾ; ദുബായിൽ റോബോട്ടുകൾക്ക് വിവാഹം

ദുബായ് : ഏറെ വ്യത്യസ്തമായ ഒരു വിവാഹചടങ്ങിന് സാക്ഷ്യം വഹിച്ചിരിക്കുകയാണ് ദുബായ്. ദുബായിൽ നിന്നുള്ള ബു സുനൈദയും മോസയും വിവാഹിതരായി. എഐ ഹ്യൂമനോയിഡ് റോബോട്ടുകളാണ് ഇരുവരും എന്നതാണ് കൗതുകം. സമൂഹമാധ്യമങ്ങളിലൂടെ ശ്രദ്ധേയനായ എഐ ഹ്യൂമനോയ്ഡ് റോബോട്ടാണ് ബു സുനൈദ. സുനൈ​ദയുടെ വധുവായ മോസയും റോബോട്ടാണ്. എമിറാത്തി പാരമ്പര്യപ്രകാരമായിരുന്നു വിവാഹമെന്നാണ് റിപ്പോർട്ട്. ഇരു റോബോട്ടുകളും എമിറാത്തി വസ്ത്രങ്ങൾ ധരിച്ചുനിൽക്കുന്ന ചിത്രങ്ങളും സമൂഹമാധ്യമങ്ങളിൽ പങ്കുവച്ചിട്ടുണ്ട്. ആ​ഗസ്ത് ഒന്നിനായിരുന്നു ചടങ്ങുകളെന്നാണ് റിപ്പോർട്ട്.

പരമ്പരാഗത കന്തൂറ ധരിച്ച ബു സുനൈദ വിവാഹത്തിനായി ഒരുങ്ങുന്നതും മോസയ്ക്ക് പൂച്ചെണ്ട് സമ്മാനിക്കുന്നതും വീഡിയോയിൽ കാണാം. അബായയും ശിരോവസ്ത്രവും ധരിച്ചാണ് മോസ പ്രത്യക്ഷപ്പെട്ടത്. എമിറാത്തി നൃത്തവും കരിമരുന്ന് പ്രയോ​ഗവും വിവാഹച‍ടങ്ങുകൾക്കുണ്ടായിരുന്നു. വിവാഹത്തിൽ പങ്കെടുത്ത എല്ലാവർക്കും ബു സുനൈദ സമൂഹമാധ്യമങ്ങളിലൂടെ നന്ദി അറിയിച്ചു.

Lootah Robotics വികസിപ്പിച്ച Unitree G1 മോഡൽ ഹ്യൂമനോയ്ഡ് റോബോട്ടാണ് ബു സുനൈദ. 1.27 മീറ്റർ ഉയരവും ഏകദേശം 35 കിലോഗ്രാം ഭാരവുമുള്ള ഈ റോബോട്ട് ഗവേഷണത്തിനും പ്രദർശനങ്ങൾക്കുമായി നിർമിച്ചതാണ്. അറബിയിൽ ജനങ്ങളുമായി സംവദിക്കുകയും സാമൂഹിക–സാംസ്കാരിക പരിപാടികളിൽ പങ്കെടുക്കുകയും ചെയ്യുന്ന ബു സുനൈദയ്ക്ക് ഇൻസ്റ്റഗ്രാമിൽ 12,000-ത്തിലധികം ഫോളോവേഴ്സുണ്ട്. എന്നാൽ ഇത് യഥാർഥ വിവാഹമല്ലെന്നും റോബോട്ടിനെ നിർമിച്ച കമ്പനി ഒരുക്കിയ പരസ്യ പ്രചാരണമാണെന്നും റിപ്പോർട്ടുകൾ പുറത്തുവന്നു. ഇതോടെ വിവാഹം പോലുള്ള മതപരമായ ചടങ്ങുകളെ പരസ്യത്തിനായി ഉപയോ​ഗിക്കുന്നതിനെതിരെ ഒരു വിഭാ​ഗം രം​ഗത്തെത്തി. വിവാഹത്തെ അനുകൂലിച്ചും എതിർത്തും സോഷ്യൽ മീഡിയയിൽ ചർച്ചകളും സജീവമായി.