സൈബർ ആക്രമണങ്ങൾ സമ്പദ്‌വ്യവസ്ഥയെ ബാധിച്ചു; ഉപയോക്താക്കൾക്ക് നഷ്ടപരിഹാരം പ്രഖ്യാപിച്ച് ജാപ്പനീസ് കമ്പനികൾ

ടോക്കിയോ: സൈബർ ആക്രമണ പരമ്പരകളെത്തുടർന്ന് ഉപയോക്താക്കൾക്ക് നഷ്ടപരിഹാരം നൽകാൻ ജാപ്പനീസ് കമ്പനികൾ. ഇൻ്റർനെറ്റ് സേവനങ്ങളെ തടസ്സപ്പെടുത്തുകയും സാമ്പത്തിക സ്ഥിരതയെക്കുറിച്ചുള്ള ആശങ്കകൾ ഉയർത്തുകയും ചെയ്ത് സൈബർ ആക്രമണങ്ങൾ വർധിച്ചതോടെയാണ് ജാപ്പനീസ് കമ്പനികളുടെ നീക്കം.

ഓൺലൈൻ സാമ്പത്തിക സേവനങ്ങൾ നൽകുന്ന പ്രമുഖ സ്ഥാപനമായ ജിഎംഒ ഇൻ്റർനെറ്റ് ഗ്രൂപ്പ്, തങ്ങളുടെ ഫോറെക്സ് ട്രേഡിംഗ് (FX trading) സേവനത്തിന് നേരെയുണ്ടായ സൈബർ ആക്രമണത്തിൽ അനധികൃതമായി വിവരങ്ങൾ ചോർന്നതിലൂടെ നഷ്ടം സംഭവിച്ച ഉപയോക്താക്കൾക്ക് തുക തിരികെ നൽകുമെന്ന് അറിയിച്ചു.

ഇതിന് പുറമെ, ഉപയോക്താക്കളോടുള്ള ആദരസൂചകമായി എല്ലാവർക്കും 5,000 യെൻ (ഏകദേശം 32 ഡോളർ) വീതം നൽകുമെന്ന് കമ്പനി സിഇഒ മസതോഷി കുമഗായി വ്യക്തമാക്കി. ക്രിപ്റ്റോകറൻസി ട്രേഡിംഗും അടക്കം നിരവധി സേവനങ്ങൾ നൽകുന്ന ഗ്രൂപ്പിന്റെ തലവനായ കുമഗായി, "ഇൻ്റർനെറ്റ് സംവിധാനം തന്നെ തകരാൻ തുടങ്ങിയിരിക്കുകയാണ്," എന്ന് അഭിപ്രായപ്പെട്ടു.

ജാപ്പനീസ് പ്രധാനമന്ത്രി സനേ തകൈച്ചി, സൈബർ ആക്രമണങ്ങളെ പ്രതിരോധിക്കുന്നതിനായി അടുത്ത ആഴ്ചയോടെ സർക്കാർ അടിയന്തര സൈബർ സുരക്ഷാ പാക്കേജിന് രൂപം നൽകുമെന്ന് പ്രഖ്യാപിച്ചു. പൊതുവെ ജാപ്പനീസ് കമ്പനികൾ കടുത്ത സൈബർ ആക്രമണ ഭീഷണി നേരിടുകയാണ്. സോഫ്റ്റ്‌വെയറുകളിലെ സുരക്ഷാ വീഴ്ചകൾ പരിശോധിക്കുന്നത് മുതൽ ഫിഷിംഗ് തട്ടിപ്പുകൾ ആസൂത്രണം ചെയ്യുന്നത് വരെയുള്ള ജോലികൾ, എഐ വഴി സ്വയംപ്രേരിതമായി ചെയ്യാനാകുന്നത് സൈബർ കുറ്റകൃത്യങ്ങളുടെ വേഗത കൂട്ടാനും ചെലവ് കുറയ്ക്കാനും കണ്ടെത്താൻ പ്രയാസമുള്ളതുമാക്കുന്നുവെന്ന് വിദഗ്ദ്ധർ ചൂണ്ടിക്കാണിക്കുന്നു.

വെള്ളിയാഴ്ചത്തെ കണക്കനുസരിച്ച് 2.6 ബില്യൺ ഡോളർ വിപണി മൂല്യമുള്ള ജിഎംഒയുടെ ഓഹരികൾ 16 ശതമാനത്തോളം ഇടിഞ്ഞ്, കഴിഞ്ഞ നാല് മാസത്തിനിടയിലെ ഏറ്റവും താഴ്ന്ന നിലയിലെത്തി. ടോക്കിയോ ബെഞ്ച്മാർക്ക് സൂചികയിൽ 0.2 ശതമാനം വർധന രേഖപ്പെടുത്തിയപ്പോഴാണ് കമ്പനിക്ക് ഈ തിരിച്ചടിയുണ്ടായത്.

PHP പ്രോഗ്രാമിംഗ് ലാംഗ്വേജിൽ ഗുരുതരമായ സുരക്ഷാ വീഴ്ചകൾ കണ്ടെത്തിയതിനെ തുടർന്ന്, ദശലക്ഷക്കണക്കിന് ഹാക്കിംഗ് ശ്രമങ്ങൾ നടന്നതോടെ ജപ്പാനിലെയും യൂറോപ്പിലെയും മറ്റ് രാജ്യങ്ങളിലെയും നിരവധി സർക്കാർ-കമ്പനി വെബ്‌സൈറ്റുകൾ കഴിഞ്ഞ ആഴ്ച പ്രവർത്തനരഹിതമായിരുന്നു. മൈക്രോസോഫ്റ്റ് സെക്യൂരിറ്റി ഡാറ്റ പ്രകാരം ഒക്ടോബർ 20 വരെയുള്ള ഈ വർഷത്തിൽ 723 സൈബർ സുരക്ഷാ സംഭവങ്ങളാണ് റിപ്പോർട്ട് ചെയ്തിട്ടുള്ളത്. ഇത് 2025, 2024 വർഷങ്ങളിലെ വാർഷിക കണക്കുകളേക്കാൾ കൂടുതലാണ്.