18 കാരറ്റിന്റെ സ്വർണ ടോയ്‍ലെറ്റ്; വിറ്റുപോയത് 1.21 കോടിക്ക്

ന്യൂയോർക്ക് സിറ്റി: കലാകാരൻ മൗറീഷ്യോ കാറ്റലൻ രൂപകൽപ്പന ചെയ്ത 18 കാരറ്റിന്റെ സ്വർണ ടോയ്‍ലെറ്റ് സാമൂഹ്യ മാധ്യമങ്ങളിൽ വലിയ തോതിൽ ചർച്ചയായിരുന്നു. 'അമേരിക്ക' എന്ന് പേരിട്ടിരിക്കുന്ന മുഴുവനായും പ്രവർത്തനക്ഷമമായ സ്വർണ ടോയ്‍ലെറ്റാണ് 1.21 കോടിക്ക് വിറ്റുപോയത്.

അതിസമ്പന്നരെ പരിഹസിക്കുന്നതാണ് ഈ കലാസൃഷ്ടി. "നിങ്ങൾ എന്ത് കഴിച്ചാലും, 200 ഡോളറിന്റെ ലഞ്ചായാലും 2 ഡോളറിന്റെ ഹോട്ട് ഡോഗ് ആയാലും, ടോയ്‌ലറ്റിൽ പോകുമ്പോൾ സംഭവിക്കുന്നത് ഒന്നുതന്നെയാണ്" എന്നാണ് നേരത്തെ അദ്ദേഹം ഈ കലാസൃഷ്ടിയെ കുറിച്ച് പറഞ്ഞത്.

ഇംഗ്ലണ്ടിലെ ബ്ലെൻഹൈം കൊട്ടാരത്തിൽ പ്രദർശിപ്പിച്ചിരിക്കെ ഇത് മോഷ്ടിക്കപ്പെട്ടു. 2019 സെപ്തംബറിലാണ് മോഷ്ടിച്ച കാറുകളില്‍ എത്തിയ അഞ്ചുപേര്‍ ഇംഗ്ലണ്ടിലെ ബ്ലെന്‍ഹൈം കൊട്ടാരത്തില്‍ അതിക്രമിച്ചുകയറി പ്രദര്‍ശനത്തിന് വച്ചിരുന്ന സ്വര്‍ണ ടോയ്‌ലെറ്റ് മോഷ്ടിക്കുകയായിരുന്നു. മോഷണ സ്വര്‍ണം വില്‍ക്കാനായി ശ്രമിച്ച ഫ്രെഡ് ഡോ എന്നയാളെ രണ്ട് വർഷത്തിന് ശേഷം കോടതി വെറുതെവിട്ടു.