ബംഗ്ലാദേശിൽ ഭൂചലനം; കൊൽക്കത്തയിലും പ്രകമ്പനം

ധാക്ക : ബം​ഗ്ലാദേശിൽ ഭൂചലനം. വെള്ളി പകലാണ് റിക്ടർ സ്കെയിലിൽ 5.7 തീവ്രത രേഖപ്പെടുത്തിയ ഭൂചലനമുണ്ടായത്. ബം​ഗ്ലാദേശിലെ നർസിംഗ്ഡിയിലും ധാക്കയിലുമുണ്ടായ ഭൂചലനത്തെത്തുടർന്ന് വെസ്റ്റ് ബം​ഗാളിലെ ചില ഭാ​ഗങ്ങളിലും വടക്കുകിഴക്കൻ സംസ്ഥാനങ്ങളിലും പ്രകമ്പനമുണ്ടായി. നർസിംഗ്ഡിയിൽ നിന്ന് 13 കിലോമീറ്റർ തെക്ക്-തെക്ക് പടിഞ്ഞാറ് മാറി രാവിലെ 10.08 ന് 10 കിലോമീറ്റർ ആഴത്തിലാണ് ഭൂചലനമുണ്ടായതെന്ന് നാഷണൽ സെന്റർ ഫോർ സീസ്മോളജി അറിയിച്ചു. ഭൂകമ്പം ഏതാനും മിനിറ്റുകളോളം നീണ്ടുനിന്നു.

ആളപായമോ നാശനഷ്ടങ്ങളോ റിപ്പോർട്ട് ചെയ്തിട്ടില്ലെന്ന് ഉദ്യോഗസ്ഥർ പറഞ്ഞു. ഭൂകമ്പമുണ്ടായതോടെ ജനങ്ങൾ വീടുകളിൽ നിന്ന് പുറത്തേക്ക് ഓടി. പശ്ചിമ ബംഗാളിലും വടക്കുകിഴക്കൻ സംസ്ഥാനങ്ങളിലും, കൊൽക്കത്ത, അസമിലെ ഗുവാഹത്തി എന്നിവിടങ്ങളിലുൾപ്പെടെ നിരവധിപേർ വീടുകളിൽ നിന്നും കെട്ടിടങ്ങളിൽ നിന്നും പുറത്തേക്ക് ഓടുന്നതിന്റെ ദൃശ്യങ്ങൾ പുറത്തുവന്നു.