പീഡനശ്രമത്തിൽ നിന്ന് രക്ഷപ്പെടാൻ വനത്തിലേക്ക് ഓടി; യുവതിയെ സാഹസികമായി രക്ഷപെടുത്തി പൊലീസ്

ഭുവനേശ്വർ: ഭുവനേശ്വറിന് സമീപമുള്ള വനമേഖലയിൽ വെച്ച് ബലാത്സംഗശ്രമത്തെ അതിജീവിച്ച് കാട്ടിൽ അകപ്പെട്ട യുവതിയെ പോലീസ് സാഹസികമായി രക്ഷപ്പെടുത്തി. ഡ്രോണുകൾ, ഫ്ലെയർ ഗണ്ണുകൾ, റോക്കറ്റ് പടക്കങ്ങൾ എന്നിവ ഉപയോഗിച്ചാണ് പോലീസ് യുവതിയെ കണ്ടെത്തിയത്.

ഖുർദ ബസ് സ്റ്റാൻഡിൽ നിന്ന് ബൈക്കിൽ ലിഫ്റ്റ് ചോദിച്ചു കയറിയ യുവതിയെ, ബൈക്ക് ഓടിച്ചിരുന്നയാൾ ലൈംഗികമായി പീഡിപ്പിക്കാൻ ശ്രമിക്കുകയായിരുന്നു.

രത്തൻപുർ റിസർവ് വനത്തിലേക്ക് ബൈക്ക് കൊണ്ടുപോയി ഉപദ്രവിക്കാൻ ശ്രമിച്ചപ്പോൾ യുവതി ചെറുത്തുനിൽക്കുകയും ഓടി വനത്തിനുള്ളിലേക്ക് രക്ഷപ്പെടുകയുമായിരുന്നു. വനത്തിനുള്ളിൽ വെച്ച് വഴിതെറ്റിയ യുവതി ഉടൻ തന്നെ പോലീസിനെ ഫോണിലൂടെ ബന്ധപ്പെടുകയായിരുന്നു.

യുവതിയുടെ ഫോണിലെ ജിപിഎസ് ലൊക്കേഷൻ ലഭ്യമല്ലാത്തതിനാൽ, പോലീസ് സംഘം ഡ്രോണുകളും ഫ്ലെയർ ഗണ്ണുകളും റോക്കറ്റ് പടക്കങ്ങളും ഉപയോഗിച്ച് വെളിച്ചം നൽകിയാണ് അവരെ കണ്ടെത്തിയത്.

ഇൻഫോവാലി, ജടാനി, ഖണ്ഡഗിരി പോലീസ് സ്റ്റേഷനുകളിൽ നിന്നുള്ള 50-ഓളം പോലീസ് ഉദ്യോഗസ്ഥർ ചേർന്നാണ് രക്ഷാപ്രവർത്തനം നടത്തിയത്. ആദ്യം പരാതി നൽകാൻ വിസമ്മതിച്ച യുവതിയെ പിന്നീട് കൗൺസിലിംഗിന് വിധേയയാക്കി. സംഭവത്തിൽ കേസെടുത്ത പോലീസ് പ്രതിയെ അറസ്റ്റ് ചെയ്യുകയും കൃത്യത്തിന് ഉപയോഗിച്ച ബൈക്ക് കസ്റ്റഡിയിലെടുക്കുകയും ചെയ്തു.