ഭിന്നത പടർത്തുന്നവർ ഭീകരവാദികളെ സഹായിക്കുന്നു: മുഹമ്മദ് സലിം

കൊൽക്കത്ത: പഹൽഗാമിലെ ഭീകരാക്രമണത്തിൽ പ്രതിഷേധിച്ചും ഭീകരതയ്‌ക്കെതിരെ ജനകീയ ഐക്യം ആഹ്വാനംചെയ്‌തും ഇടതുമുന്നണിയുടെ ആഭിമുഖ്യത്തിൽ കൊൽക്കത്തയിൽ ആയിരങ്ങൾ അണിനിരന്ന പ്രകടനം. സിപിഐ എം സംസ്ഥാന സെക്രട്ടറി മുഹമ്മദ് സലിം, മുതിർന്ന സിപിഐ എം നേതാവ് സൂര്യകാന്ത മിശ്ര, പൊളിറ്റ്ബ്യൂറോ അംഗം ശ്രീദീപ് ഭട്ടാചാര്യ, കേന്ദ്ര കമ്മിറ്റി അംഗം സുജൻ ചക്രവർത്തി, ആർഎസ്-പി ജനറൽ സെക്രട്ടറി മനോജ് ഭട്ടാചാര്യ, സിപിഐ നേതാക്കളായ മധുചന്ദ ദേബ്, ഗൗതം റോയ്, ഫോർവേഡ് ബ്ലോക് നേതാവ് സഞ്ജീവ് ചാറ്റർജി തുടങ്ങിയവർ നേതൃത്വം നൽകി.

മനുഷ്യത്വം ആക്രമിക്കപ്പെടുമ്പോഴെല്ലാം ജനങ്ങൾ ഒറ്റക്കെട്ടായി തെരുവിലിറങ്ങുമെന്ന് മുഹമ്മദ് സലിം പറഞ്ഞു. വിവിധ തീവ്ര ഹിന്ദുത്വ വിഭാഗങ്ങൾ സമൂഹത്തിൽ ഭിന്നത പടർത്തുന്നുണ്ട്. ഭീകരവാദികളെ സഹായിക്കുന്ന നിലപാടാണവർക്ക്. ജമ്മു കശ്‌മീരിലെ ഗുരുതര സുരക്ഷാവീഴ്‌ചയുടെ ഉത്തരവാദിത്വം മോദി സർക്കാരിനാണെന്നും സലിം പറഞ്ഞു.