print edition സെമികണ്ടക്‌ടർ യൂണിറ്റ് കിട്ടിയതിന് പ്രത്യുപകാരം ; ടാറ്റാ ഗ്രൂപ്പ് ബിജെപിക്ക്‌ 
നൽകിയത്‌ 758 കോടി

ന്യൂഡൽഹി

കഴിഞ്ഞ ലോക്‌സഭാ തെരഞ്ഞെടുപ്പിന്‌ മുമ്പായി ടാറ്റാ ഗ്രൂപ്പിന്‌ രണ്ട്‌ സെമികണ്ടക്‌ടർ യൂണിറ്റ്‌ അനുവദിച്ചുകൊണ്ട്‌ ബിജെപി സ്വന്തമാക്കിയത്‌ 758 കോടി രൂപ. 2024 ഫെബ്രുവരി 29ന്‌ പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്രമന്ത്രിസഭാ യോഗമാണ്‌ ടാറ്റാ ഗ്രൂപ്പിന്‌ രണ്ട്‌ സെമികണ്ടക്‌‍ടർ യൂണിറ്റ്‌ അനുവദിച്ചത്‌. തൊട്ടുപിന്നാലെയെത്തിയ ലോക്‌സഭാ തെരഞ്ഞെടുപ്പ്‌ വേളയിൽ ടാറ്റാ ഗ്രൂപ്പിന്റെ പ്രോഗ്രസീവ്‌ ഇലക്‌ടറൽ ട്രസ്റ്റ്‌ ബിജെപിക്ക്‌ 758 കോടി രൂപ സംഭാവന നൽകി.

വൻകിട പദ്ധതികൾ കോർപറേറ്റുകൾക്ക്‌ അനുവദിക്കുക വഴി ബിജെപി പണംതട്ടുന്നതിന്റെ ഏറ്റവും പുതിയ ഉദാഹരണമാണിത്. 2024 ഫെബ്രുവരിയിൽ ചേർന്ന മന്ത്രിസഭാ യോഗം മൂന്ന്‌ സെമികണ്ടക്‌ടർ യൂണിറ്റിനാണ്‌ അനുമതി നൽകിത്‌. ബിജെപി ഭരിക്കുന്ന ഗുജറാത്തിൽ രണ്ടും അസമിൽ ഒന്നും അനുവദിച്ചു. ടാറ്റാ ഗ്രൂപ്പിന്‌ ഗുജറാത്തിലെയും അസമിലെയും ഓരോ യൂണിറ്റുവീതം ലഭിച്ചു.

രാജ്യത്തെ സെമികണ്ടക്‌ടർ വ്യവസായം പ്രോത്സാഹിപ്പിക്കുന്നതിന്റെ ഭാഗമായി വൻ സബ്‌സിഡിയോടെയാണ്‌ പദ്ധതി അനുവദിച്ചത്‌. രണ്ട്‌ യൂണിറ്റ് ലഭിച്ച ടാറ്റ സബ്‌സിഡി ഇനത്തിൽ മാത്രം കീശയിലാക്കിയത്‌ 44,203 കോടി രൂപ. ടാറ്റയ്‌ക്ക്‌ പുറമെ മുരുഗപ്പ ഗ്രൂപ്പിനും ഒരു സെമികണ്ടക്‌ടർ യൂണിറ്റ്‌ ലഭിച്ചു. 125 കോടി രൂപ മുരുഗപ്പ ഗ്രൂപ്പ്‌ സംഭാവനയെന്ന പേരിൽ ബിജെപിക്ക്‌ നൽകി. ചുരുക്കത്തിൽ മൂന്ന്‌ സെമികണ്ടക്‌ടർ യൂണിറ്റുകൾ മോദി സർക്കാർ അനുവദിച്ചപ്പോൾ ബിജെപിക്ക് കിട്ടിയത് 900 കോടിയോളം രൂപ.

2023–24 വർഷത്തിൽ ടാറ്റാ ഗ്രൂപ്പിന്റെ പ്രോഗ്രസീവ്‌ ഇലക്‌ടറൽ ട്രസ്റ്റ്‌ രാഷ്‌ട്രീയപാർടികൾക്കായി ആകെ നൽകിയ സംഭാവന 915 കോടി രൂപയാണ്‌. ഇതിൽ 758 കോടിയും ബിജെപിക്കാണ്‌. മുഖ്യപ്രതിപക്ഷമായ കോൺഗ്രസിന്‌ ടാറ്റാ ഗ്രൂപ്പ്‌ 77.3 കോടി രൂപ നൽകി. മറ്റ്‌ എട്ട്‌ പാർടികൾക്കായി 10 കോടി രൂപ വീതവും.