തമിഴ്‌നാട്ടിൽ ബസുകൾ കൂട്ടിയിടിച്ച് അപകടം; ഏഴ് പേര്‍ മരിച്ചു, 40 പേർക്ക് പരിക്ക്

ചെന്നൈ: തമിഴ്‌നാട്ടിൽ രണ്ട് ബസുകൾ കൂട്ടിയിടിച്ചുണ്ടായ അപകടത്തിൽ ഏഴ് പേർ മരിച്ചു. 40 ഓളം പേർക്ക് പരിക്കേറ്റു. ഞായറാഴ്ച തിരുപ്പത്തൂരിന് സമീപമുള്ള റോഡിലാണ് സംഭവം.

ഒരു ബസ് കാരൈക്കുടിയിലേക്കും മറ്റൊന്ന് മധുരയിലേക്കും പോകുകയായിരുന്നു. തിരുപ്പത്തൂരിന് അടുത്തുവെച്ച് ഇരുബസുകളും നേർക്കുനേർ കൂട്ടിയിടിക്കുകയായിരുന്നു. നിരവധി യാത്രക്കാർ വാഹനങ്ങൾക്കുള്ളിൽ കുടുങ്ങിയിരുന്നു. തുടർന്ന് പ്രദേശവാസികളും രക്ഷാപ്രവർത്തകരും ചേർന്നാണ് യാത്രക്കാരെ പുറത്തെത്തിച്ചത്.

പരിക്കേറ്റവരെ ഉടൻതന്നെ ശിവഗംഗൈ സർക്കാർ ആശുപത്രിയിലേക്ക് മാറ്റി. പരിക്കേറ്റ ചിലരുടെ നില അതീവ ഗുരുതരമായതിനാൽ മരണസംഖ്യ ഇനിയും വർധിക്കാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി.

പൊലീസ് അന്വേഷണം ആരംഭിച്ചു. രക്ഷാപ്രവർത്തനങ്ങൾ നടക്കുന്നതിനാൽ ഈ റൂട്ടിൽ താൽക്കാലികമായി ഗതാഗത നിയന്ത്രണങ്ങൾ ഏർപ്പെടുത്തിയിട്ടുണ്ട്.