മണിപ്പൂരിൽ വൻ ആയുധശേഖരം പിടികൂടി സുരക്ഷാ സേന

ഇംഫാൽ: മണിപ്പൂരിൽ വൻ ആയുധശേഖരം പിടികൂടിയതായി റിപ്പോർട്ട്. സേനാപതി, ചുരാചന്ദ്പൂർ ജില്ലകളിൽ നടത്തിയ പ്രത്യേക ഓപ്പറേഷനുകളിൽ ആയുധങ്ങൾ, വെടിക്കോപ്പുകൾ, സ്ഫോടകവസ്തുക്കൾ തുടങ്ങിയവ സുരക്ഷാ സേന കണ്ടെടുത്തു.

സേനാപതി പോലീസ് സ്റ്റേഷന് കീഴിലുള്ള മാരേമൈ-ഹെങ്ബംഗ് കുന്നിൻ പ്രദേശങ്ങളിൽ നടത്തിയ തെരച്ചിൽ ഓപ്പറേഷനിൽ വിവിധതരം ആയുധങ്ങളും വെടിക്കോപ്പുകളും കണ്ടെടുത്തതായി പോലീസ് പറഞ്ഞു. 22 റൈഫിളുകൾ, നാല് ബോൾട്ട്-ആക്ഷൻ റൈഫിളുകൾ, ഷോട്ട്ഗൺ തുടങ്ങിയവയാണ് കണ്ടെത്തിയതെന്ന് യുണൈറ്റഡ് ന്യൂസ് ഓഫ് ഇന്ത്യ റിപ്പോർട്ട് ചെയ്തു. കൂടാതെ, വ്യത്യസ്ത കാലിബറുകളിലുള്ള 79 ലൈവ് റൗണ്ട് വെടിയുണ്ടകളും 13 ഒഴിഞ്ഞ കാട്രിഡ്ജ് കേസുകളും സുരക്ഷാ ഉദ്യോഗസ്ഥർ പ്രദേശത്ത് നിന്ന് പിടിച്ചെടുത്തു.