രാഹുൽ ഗാന്ധിയുടെ ഡൽഹി സർവകലാശാല സന്ദർശനം വിവാദത്തിൽ

ന്യൂഡൽഹി : ഡൽഹി സർവകലാശാലയിൽ ലോക്സഭാ പ്രതിപക്ഷ നേതാവ്‌ രാഹുൽ ഗാന്ധി നടത്തിയ അപ്രതീക്ഷിത സന്ദർശനം വിവാദത്തിൽ. മുൻകൂർ അറിയിക്കാതെ ഒരു മണിക്കൂറോളം സർവകലാശാലയിൽ ചിലവഴിച്ച നടപടിക്കെതിരെ സർവകലാശാല അധികൃതർ രംഗത്തെത്തി. രാഹുൽഗാന്ധി പ്രോട്ടോക്കോൾ ലംഘനം നടത്തിയെന്നും രണ്ടാം തവണയാണ് ഇത്തരത്തിൽ ഡൽഹി സർവകലാശാലയ്ക്ക് യാതൊരു അറിയിപ്പും നൽകാതെ എത്തുന്നതെന്നും പ്രോക്ടർ ഓഫീസ് ഔദ്യോഗിക പ്രസ്താവനയിൽ പറഞ്ഞു.

വ്യാഴാഴ്‌ച സർവകലാശാലയിലെത്തിയ രാഹുൽ ഗാന്ധി വിദ്യാർഥി യൂണിയൻ ഓഫീസിൽ പട്ടികജാതി, പട്ടികവർഗ, മറ്റ് പിന്നോക്ക വിഭാഗങ്ങളിൽ നിന്നുള്ള വിദ്യാർഥികളുമായി കൂടിക്കാഴ്ച നടത്തിയിരുന്നു. സന്ദർശനത്തെ തുടർന്ന്‌ വിദ്യാർഥി യൂണിയൻ ഓഫീസ്‌ സുരക്ഷാസേന വളഞ്ഞതായും യൂണിയൻ സെക്രട്ടറിയുൾപ്പെടെയുള്ളവർക്ക്‌ പ്രവേശനം തടഞ്ഞതായും അധികൃതർ പറഞ്ഞു.

കോൺഗ്രസ് പിന്തുണയുള്ള വിദ്യാർഥി സംഘടനയായ എൻഎസ്‌യുഐ ചില വിദ്യാർഥികളെ യൂണിയൻ ഓഫീസിൽ പൂട്ടിയിട്ടെന്ന്‌ ആരോപണം ഉയർന്നു. അതിക്രമം നടത്തിയ വിദ്യാർഥികൾക്കെതിരെ നടപടിയെടുക്കുമെന്ന്‌ സർവകലാശാല അറിയിച്ചു. എന്നാൽ, വിദ്യാർഥി യൂണിയൻ നടത്തുന്ന പരിപാടിക്ക്‌ അതിഥിയെ ക്ഷണിക്കാൻ സർവകലാശാലയുടെ അനുമതി വേണ്ടെന്ന്‌ സമാധാനപരമായാണ്‌ പരിപാടി നടന്നതെന്നും യൂണിയൻ പ്രസിഡന്റ്‌ റോണക് ഖത്രി പ്രതികരിച്ചു. രാഹുൽ ഗാന്ധി നടത്തിയത്‌ ഫോട്ടോഷൂട്ട്‌ നാടകമാണെന്ന്‌ പറഞ്ഞ്‌ എബിവിപി വിവാദമാക്കിയതോടെ ബിജെപിയും വിഷയം ഏറ്റെടുത്തു. കഴിഞ്ഞയാഴ്‌ച ബിഹാറിലെ ദർഭംഗയിലെ അംബേദ്കർ ഹോസ്റ്റലിൽ ഔദ്യോഗിക അനുമതിയില്ലാതെ സന്ദർശനം നടത്തിയതിന്‌ രാഹുൽ ഗാന്ധിക്കെതിരെ കേസെടുത്തിരുന്നു.