പുതുച്ചേരി ആര് ഭരിക്കും? നിർണായക നിമിഷങ്ങൾ; വോട്ടെണ്ണൽ പുരോ​ഗമിക്കുന്നു

പുതുച്ചേരി: പുതുച്ചേരി നിയമസഭാ തെരഞ്ഞെടുപ്പിന്റെ വോട്ടെണ്ണൽ പുരോഗമിക്കുമ്പോൾ കേന്ദ്രഭരണ പ്രദേശം കനത്ത ആകാംക്ഷയിലാണ്. തിങ്കളാഴ്ച രാവിലെ എട്ട് മണിയോടെയാണ് വോട്ടെണ്ണൽ പ്രക്രിയ ആരംഭിച്ചത്. ഇലക്ട്രോണിക് വോട്ടിംഗ് യന്ത്രങ്ങൾ (ഇവിഎം) തുറക്കുന്നതിന് മുന്നോടിയായി പോസ്റ്റൽ ബാലറ്റുകളാണ് ആദ്യഘട്ടത്തിൽ എണ്ണുന്നത്. ആകെ 12,936 പോസ്റ്റൽ ബാലറ്റുകളാണ് നിലവിൽ എണ്ണിക്കൊണ്ടിരിക്കുന്നത്.

പുതുച്ചേരി, കാരക്കൽ, മാഹി, യാനം എന്നീ നാല് മേഖലകളിലായി വ്യാപിച്ചുകിടക്കുന്ന 30 നിയമസഭാ മണ്ഡലങ്ങളിലേക്കായി ആറ് വോട്ടെണ്ണൽ കേന്ദ്രങ്ങളാണ് സജ്ജീകരിച്ചിട്ടുള്ളത്. പുതുച്ചേരിയിൽ 23 മണ്ഡലങ്ങളും കാരക്കലിൽ അഞ്ചും മാഹിയിലും യാനത്തിലും ഓരോ മണ്ഡലങ്ങളുമാണുള്ളത്. വോട്ടെണ്ണൽ സുഗമമാക്കുന്നതിനായി വിപുലമായ സുരക്ഷാ ക്രമീകരണങ്ങളാണ് ചീഫ് ഇലക്ടറൽ ഓഫീസർ പി ജവഹറിന്റെ നേതൃത്വത്തിൽ ഒരുക്കിയിരിക്കുന്നത്. സ്ഥാനാർഥികളും രാഷ്ട്രീയ പാർടി പ്രതിനിധികളും രാവിലെ ഏഴ് മണിയോടെ തന്നെ വോട്ടെണ്ണൽ കേന്ദ്രങ്ങളിൽ എത്തിച്ചേർന്നു.

ഭരണം നിലനിർത്താൻ ശ്രമിക്കുന്ന മുഖ്യമന്ത്രി എൻ രംഗസാമിയുടെ നേതൃത്വത്തിലുള്ള എഐഎൻആർസി-ബിജെപി സഖ്യം (എൻഡിഎ) ഉൾപ്പെടെ 294 സ്ഥാനാർഥികളാണ് ജനവിധി തേടുന്നത്. എൻഡിഎ സഖ്യത്തിന് വെല്ലുവിളിയുമായി കോൺഗ്രസ്, ഡിഎംകെ, വിസികെ എന്നിവരടങ്ങുന്ന ഇന്ത്യ ബ്ലോക്കും ശക്തമായ പോരാട്ടമാണ് കാഴ്ചവെച്ചത്. കഴിഞ്ഞ ഏപ്രിൽ ഒമ്പതിനാണ് പുതുച്ചേരിയിൽ നിയമസഭാ തെരഞ്ഞെടുപ്പ് നടന്നത്. ഏതാനും മണിക്കൂറുകൾക്കുള്ളിൽ കേന്ദ്രഭരണ പ്രദേശം ആര് ഭരിക്കുമെന്ന കാര്യത്തിൽ വ്യക്തമായ ചിത്രം പുറത്തുവരും.