ബ്രോഡ് ​ഗേജ് പാത പൂർത്തിയായി; ഇന്ത്യ-നേപ്പാൾ ട്രെയിൻ സർവീസ് പുനരാരംഭിക്കുന്നു

ലഖ്നൗ: ഇന്ത്യ-നേപ്പാൾ റെയിൽപാത ട്രെയിൻ സർവീസ് പുനരാരംഭിക്കുന്നു. നേപ്പാൾ​ഗഞ്ച് റോഡ്-നൻപാറ-ബഹ്റൈച്ച് റൂട്ടിൽ വൈദ്യുതീകരിച്ച ബ്രോഡ് ​ഗേജ് പാത പൂർത്തിയായതോടെയാണ് സർവീസ് പുനരാരംഭിക്കുന്നത്. ജനങ്ങളുടെ ഏറെ കാലത്തെ ആവശ്യം കൂടിയാണിത്. ഉത്തർപ്രദേശ് മുഖ്യമന്ത്രി യോ​ഗി ആദ്യനാഥും റെയിൽവേ മന്ത്രി അശ്വിനി വൈഷ്ണവും ചേർന്ന് ഉദ്ഘാടനം ചെയ്തു.

56.15 കിലോമീറ്റർ ദൈർഘ്യമുള്ള പാതയാണ് 730 കോടി ചെലവിൽ നവീകരിച്ചത്. നിലവിലുള്ള നാല് ട്രെയിൻ സർവീസുകൾ നേപ്പാൾ​ഗഞ്ച് വരെ നീട്ടി. ഇതോടെ അതിർത്തിൽ ഇരുവശങ്ങളിലുമുള്ള ജനങ്ങളുടെ യാത്ര സു​ഗമമാകും.

വാരണാസി–ബഹ്‌റൈച്ച് എക്സ്പ്രസ് (14213/14214), വാരണാസി സിറ്റി–ഗോരഖ്പൂർ എക്സ്പ്രസ് (15132/15131), ഗോണ്ട–ബഹ്‌റൈച്ച് ട്രെയിൻ സർവീസുകളായ 75109/75110, 75111/75112 എന്നീ ട്രെയിനുകളാണ് നേപ്പാൾഗഞ്ച് റോഡ് വരെ നീട്ടിയത്. വാരാണസി സിറ്റി - നേപാൾഗഞ്ച് റോഡ് സ്പെഷ്യൽ ട്രെയിൻ സർവീസും ഈ പാതയിൽ ഫ്ലാഗ് ഓഫ് ചെയ്തു. ഇന്ത്യയും നേപ്പാളും തമ്മിലുള്ള യാത്രാസൗകര്യവും അതിർത്തി പ്രദേശങ്ങളിലെ വികസനവും ലക്ഷ്യമിട്ടാണ് ഈ പദ്ധതി നടപ്പിലാക്കിയിരിക്കുന്നത്.