പേരും മതവും രൂപവും എല്ലാം മാറ്റി; സഹോദരനെ കൊന്ന് ഒളിവിൽപോയ പ്രതി 36 വർഷത്തിന് ശേഷം പിടിയിൽ

ബറേലി: പേരും മതവും രൂപവും എല്ലാം മാറ്റിയെങ്കിലും സഹോദരനെ കൊന്ന് ജീവപര്യന്തം ശിക്ഷിക്കപ്പെട്ട പ്രതി ഒടുവിൽ പിടിയിലായി. 36 വർഷത്തെ ഒളിജീവിതത്തിന് ശേഷമാണ് പ്രതി പൊലീസിന്റെ പിടിയിലായത്. ഉത്തർപ്രദേശിലെ ബറേലി സ്വദേശിയായ പ്രദീപ് സക്‌സേനയാണ് പേരും മതവും രൂപവും മാറ്റി ഒളിവിൽ കഴിഞ്ഞിരുന്നത്.

1987-ലാണ് സക്‌സേന സഹോദരന്റെ കൊലപാതകത്തിൽ പ്രതിയാക്കപ്പെട്ടത്. 1989-ൽ ഇയാൾ കുറ്റക്കാരനാണെന്ന് കോടതി കണ്ടെത്തുകയും ജീവപര്യന്തം ശിക്ഷ വിധിക്കുകയും ചെയ്തു. എന്നാൽ പരോളിൽ ഇറങ്ങിയ സക്‌സേന പൊലീസിന്റെ കണ്ണുവെട്ടിച്ച് മുങ്ങുകയായിരുന്നു.

അവിടെ നിന്ന് 100 കിലോമീറ്റർ അകലെയുള്ള മൊറാദാബാദിലേക്ക് കടന്ന ഇയാൾ അബ്ദുൾ റഹീം എന്ന പുതിയ പേരിലേക്ക് മാറി. താടി വളർത്തി ഡ്രൈവറായി ജോലി ചെയ്തു ജീവിച്ചു. പതിറ്റാണ്ടുകൾ കടന്നുപോയപ്പോൾ പഴയ ജീവിതവും ശിക്ഷയുമെല്ലാം താൻ മറികടന്നു എന്ന് സക്‌സേന (ഇപ്പോൾ അബ്ദുൾ റഹീം) വിശ്വസിച്ചു.

എന്നാൽ നിയമത്തിന് വേറെ പദ്ധതികളുണ്ടായിരുന്നു. ഒക്ടോബർ 16ന്, പ്രതിയെ നാലാഴ്ചയ്ക്കുള്ളിൽ കോടതിയിൽ ഹാജരാക്കാൻ അലഹബാദ് ഹൈക്കോടതി പൊലീസിന് ഉത്തരവ് നൽകി. ഇതോടെ, പൊലീസ് പഴയ കേസ് ഫയലുകൾ പൊടിതട്ടിയെടുക്കുകയും ഒളിവിൽപോയ പ്രതിയെ കണ്ടെത്താൻ ഒരു പ്രത്യേക സംഘം രൂപീകരിക്കുകയും ചെയ്തു.

സക്‌സേനയുടെ സഹോദരൻ സുരേഷ് ഇപ്പോഴും ബറേലിയിൽ താമസിക്കുന്നുണ്ട്. ഇയാളുമായി പൊലീസ് ബന്ധപ്പെട്ടപ്പോഴാണ് കൊലക്കേസ് പ്രതി മതം മാറിയെന്നും പുതിയ വ്യക്തിത്വം സ്വീകരിച്ചെന്നും മനസ്സിലായത്. തുടർന്ന് നടത്തിയ അന്വേഷണത്തിൽ, സക്‌സേന ഒരു ആവശ്യത്തിനായി ബറേലിയിൽ വന്നിരുന്നു എന്നും കണ്ടെത്തി. അവിടെ വെച്ച് തന്നെ പൊലീസ് ഇയാളെ അറസ്റ്റ് ചെയ്യുകയും കോടതിയിൽ ഹാജരാക്കുകയും ചെയ്തു.

"ചോദ്യം ചെയ്യലിൽ താൻ പ്രദീപ് കുമാർ സക്‌സേനയാണെന്നും 1989-ൽ പരോളിൽ ഇറങ്ങി മുങ്ങിയതാണെന്നും ഇയാൾ സമ്മതിച്ചു. കോടതി നടപടികളിൽ നിന്ന് രക്ഷപ്പെടാൻ 2002-ൽ മതം മാറി മൊറാദാബാദിൽ താമസമാക്കുകയായിരുന്നു. ഇയാളെ ഇന്നലെ കോടതിയിൽ ഹാജരാക്കി," പൊലീസ് പറഞ്ഞു.

1987-ലെ കേസിൽ കൊലപാതകത്തിനും മോഷണത്തിനും സക്‌സേന കുറ്റക്കാരനാണെന്നാണ്. "പ്രദീപ് സക്‌സേന ഹൈക്കോടതിയിൽ ശിക്ഷക്കെതിരെ അപ്പീൽ നൽകിയ ശേഷം പരോൾ ലംഘിച്ച് കടന്നു കളയുകയായിരുന്നു. ഇയാളെ അറസ്റ്റ് ചെയ്യാൻ ഹൈക്കോടതി ആവശ്യപ്പെട്ടപ്പോൾ, നിയമത്തിൽ നിന്ന് രക്ഷപ്പെടാൻ പ്രതി തന്റെ വ്യക്തിത്വം മറച്ചുവെക്കുകയും മതം മാറുകയും ചെയ്തതായി ഞങ്ങൾ കണ്ടെത്തി," ബറേലി സിറ്റി പോലീസ് മേധാവി മനുഷ് പരീഖ് പറഞ്ഞു. സക്‌സേന മൊറാദാബാദിൽ വെച്ച് ഒരു മുസ്ലീം സ്ത്രീയെ വിവാഹം കഴിച്ചതായും അവിടെയാണ് താമസിച്ചിരുന്നതെന്നും പൊലീസ് ഉദ്യോഗസ്ഥൻ കൂട്ടിച്ചേർത്തു.