മലേഗാവ് സ്ഫോടനക്കേസ്: വിധി ജൂലൈയിൽ

മുംബൈ: ബിജെപി മുൻ എംപി പ്ര​ഗ്യാസിങ് ഠാക്കൂർ പ്രതിയായ 2008ലെ മലേ​ഗാവ് സ്ഫോടനകേസിൽ സ്പെഷ്യൽ എൻഐഎ കോടതി ജൂലൈയിൽ വിധി പറയുമെന്ന് റിപ്പോർട്ട്. നിരവധി രേഖകൾ ഉള്ളതിനാൽ സമഗ്രമായി വിലയിരുത്തുന്നതിന് കൂടുതൽ സമയം ആവശ്യമുണ്ടെന്ന് ചൂണ്ടിക്കാട്ടിയാണ് നടപടിയെന്നാണ് വിവരം.

മെയ് 8 ന് വിധി പറയുമെന്നാണ് ഏപ്രിൽ ആദ്യം എൻ‌ഐ‌എ കോടതി അറിയിച്ചിരുന്നത്. ജൂലൈ 31ന് വിധി പറയുമെന്നാണ് പുതിയ വിവരം. വിചാരണ അന്തിമഘട്ടത്തിലെത്തി നിൽക്കെ ജഡ്‍ജിയെ സ്ഥലംമാറ്റിയത് വിവാദമായിരുന്നു. കേസിൽ വാദം കേട്ട എൻഐഎ പ്രത്യേക കോടതി ജഡ്‍ജ് എ കെ ലഹോട്ടിയെയാണ് ഏപ്രിൽ ആദ്യം നാ​ഗ്പുരിലേക്ക് സ്ഥലം മാറ്റിയത്. 17 വർഷം നീണ്ട കേസിൽ സ്ഥലം മാറ്റപ്പെടുന്ന അഞ്ചാമത്തെ ജഡ്‍ജിയാണ് ലഹോട്ടി.

പ്രോസിക്യൂഷനോടും പ്രതിഭാ​ഗത്തോടും ഏപ്രിൽ 15നുള്ളിൽ വാദം പൂർത്തിയാക്കാൻ അന്ന് ജഡ്ജി നിർദേശിച്ചിരുന്നു. 2008 സെപ്തംബർ 29ന് മഹാരാഷ്ട്ര നാസിക് ജില്ലയിലെ മലേ​ഗാവിലെ പള്ളിക്കുസമീപമുണ്ടായ സ്‍ഫോടനത്തിൽ ആറുപേരാണ് കൊല്ലപ്പെട്ടത്. നൂറിലേറെ പേർക്ക് പരിക്കേറ്റു. യുഎപിഎ അടക്കം ചുമത്തിയകേസിൽ പ്ര​ഗ്യാസിങ്, ഠാക്കൂർ, ലെഫ്. കേണൽ പ്രസാദ് പുരോ​​ഹിത് തുടങ്ങിയവരാണ് പ്രതികൾ.