ഭാഷാകോളത്തിൽ ഉറു​ദുവിന് പകരം 'മുസ്ലിം': ഡൽഹി സർവകലാശാല അഡ്മിഷൻ ഫോം വിവാദത്തിൽ

ന്യൂഡൽഹി : ഡൽഹി സർവകലാശാലയിലെ ഡി​ഗ്രി പ്രവേശനത്തിനായുള്ള അഡ്മിഷൻ ഫോമിൽ ​ഗുരുതര പിഴവുകൾ. മാതൃഭാഷ എന്ന വിഭാഗത്തിൽ ലിസ്റ്റ് ചെയ്ത ഭാഷകൾക്കൊപ്പം മുസ്ലിം എന്ന ഓപ്ഷൻ ഉൾപ്പെട്ടതാണ് വിവാദമായത്. ലിസ്റ്റുചെയ്ത ഭാഷാ ഓപ്ഷനുകളിൽ മുസ്ലിം എന്ന പ്രത്യക്ഷപ്പെട്ടത് വിദ്യാർഥികളെ ആശയക്കുഴപ്പത്തിലാക്കി. ഒപ്പം ഉറുദുവിനെ പട്ടികയിൽ നിന്ന് ഒഴിവാക്കിയതും രൂക്ഷ വിമർശനത്തിന് ഇടയാക്കി. ഇന്ത്യൻ ഭരണഘടനയുടെ എട്ടാം ഷെഡ്യൂളിൽ ഔദ്യോഗികമായി അംഗീകരിക്കപ്പെട്ട 22 ഭാഷകളിൽ ഒന്നാണ് ഉറുദു. വടക്കേ ഇന്ത്യയിലുടനീളം വ്യാപകമായി സംസാരിക്കപ്പെടുന്ന ഉറുദുവിനെ ഭാഷകളുടെ പട്ടികയിൽ നിന്ന് ഒഴിവാക്കിയതാണ് വിമർശനം കൂടുതൽ രൂക്ഷമാക്കിയത്.

'മാതൃഭാഷ' വിഭാഗത്തിൽ ജാതി-തൊഴിൽ സംബന്ധിയായ പദങ്ങളായ 'ബിഹാരി', 'ചമർ', 'മസ്ദൂർ', 'ദേഹതി', 'മോച്ചി', 'കുർമി' എന്നിവയും ഉൾപ്പെടുത്തിയിട്ടുണ്ട്. ഇതോടെ ഫോമിന്റെ ഘടനയ്ക്ക് പിന്നിലെ യുക്തിയെയും ഉദ്ദേശ്യത്തെയും കുറിച്ച് ഗുരുതരമായ ചോദ്യങ്ങളാണ് ഉയർന്നത്. ഇത് വെറുമൊരു ക്ലറിക്കൽ പിശകല്ലെന്നും ഒരു സമൂഹത്തെ മുഴുവൻ ഒരു മത ലേബലിലേക്ക് ചുരുക്കി, ഭാഷാപരവും സാംസ്കാരികവും പ്രാദേശികവുമായ സ്വത്വങ്ങളെ ഇല്ലാതാക്കുന്ന വർഗീയ മാനസികാവസ്ഥയെയാണ് ഇത് പ്രതിഫലിപ്പിക്കുന്നതെന്നും ഡെമോക്രാറ്റിക് ടീച്ചേഴ്‌സ് ഫ്രണ്ട് (ഡിടിഎഫ്) ജനറൽ സെക്രട്ടറി ആഭ ദേവ് ഹബീബ് പറഞ്ഞതായി ന്യൂ ഇന്ത്യൻ എക്സ്പ്രസ് റിപ്പോർട്ട് ചെയ്തു. മുസ്ലീം ഒരു ഭാഷയല്ല. ഒരു പ്രദേശത്തുള്ള മറ്റുള്ളവരെപ്പോലെ മുസ്ലിങ്ങളും അവിടെയുള്ള ഭാഷകളാണ് സംസാരിക്കുന്നത്. അത് ഹിന്ദിയോ പഞ്ചാബിയോ തമിഴോ തെലുങ്കോ ആകാം- ഡിടിഎഫ് വ്യക്തമാക്കി.

ഡൽഹി സർവകലാശാല പോലുള്ള ഒരു മുൻനിര സർവകലാശാല ഇത്തരം തെറ്റുകൾ വരുത്തുന്നത് നിർഭാഗ്യകരമാണ്. ഇവ ഉടനടി തിരുത്തണം. വൈവിധ്യവും ബഹുഭാഷയും അംഗീകരിക്കപ്പെടുകയും ബഹുമാനിക്കപ്പെടുകയും ചെയ്യേണ്ടതുണ്ടെന്ന് ഡിടിഎഫ് എക്സിക്യൂട്ടീവ് കൗൺസിൽ അംഗം ഡോ. ​​മിഥുരാജ് ധൂസിയ പറഞ്ഞു. ഫോമിന്റെ സ്‌ക്രീൻഷോട്ടുകൾ സോഷ്യൽ മീഡിയ പ്ലാറ്റ്‌ഫോമുകളിൽ വൈറലായതോടെ സർവകലാശാല ഔദ്യോഗികമായി ക്ഷമാപണം നടത്തണമെന്നും ഉടനടി തിരുത്ത് വരുത്തണമെന്നും അധ്യാപകരും വിദ്യാർഥികളും ആവശ്യപ്പെട്ടു.

ഉറുദു ഒഴിവാക്കിയതും "മുസ്ലിം" എന്ന വാക്ക് ഒരു ഭാഷയായി ഉൾപ്പെടുത്തിയതും വെറും ഭാഷാപരമായ തെറ്റല്ലെന്നും മറിച്ച് രാഷ്ട്രീയമായി പ്രാധാന്യമുള്ള വിഷയമാണെന്നും ഡിയു അധ്യാപകരും പ്രതികരിച്ചു.