ലേസർ ട്രീറ്റ്മെന്റിനെ തുടർന്ന് മുഖത്ത് പൊള്ളലേറ്റു; 1.11 ലക്ഷം രൂപ നഷ്ടപരിഹാരം വിധിച്ച് ഉപഭോക്തൃ കമ്മീഷൻ

ബെംഗളൂരു: മുഖത്തെ മുടി നീക്കം ചെയ്യാനുള്ള ലേസർ ട്രീറ്റ്മെന്റിനെ തുടർന്ന് മുഖത്ത് പൊള്ളലേറ്റതായി യുവതിയുടെ പരാതി. അന്വേഷണത്തിൽ ക്ലിനിക്കിന്റെ ഭാഗത്ത് നിന്ന് വീഴ്ചയുണ്ടായതായി കണ്ടെത്തിയ ബെംഗളൂരു ജില്ലാ ഉപഭോക്തൃ കമ്മീഷൻ 1.11 ലക്ഷം രൂപ നഷ്ടപരിഹാരവും കോടതി ചെലവുകളും നൽകാൻ ഉത്തരവിട്ടു.

ബെംഗളൂരു നിവാസിയായ അനിത 2026 ഏപ്രിൽ 22 നാണ് മുഖത്തെ രോമവളർച്ച ഇല്ലാതാക്കാനുള്ള ലേസർ ട്രീറ്റ്‌മെന്റ് ബംഗളുരുവിലെ ബെർകോവിറ്റ്സ് ഹെയർ & സ്കിൻ ക്ലിനിക്കിൽ ചെയ്തത്. ചികിത്സയ്‌ക്കിടയിൽ തന്നെ മുഖത്ത് പൊള്ളലേൽക്കുന്നതായി അനുഭവപ്പെട്ട അനിത ക്ലിനിക്കിലെ ടെക്‌നിഷ്യനെ അറിയിച്ചെങ്കിലും അത് സാധാരണമാണെന്ന് ആയിരുന്നു മറുപടി.

എന്നാൽ ട്രീറ്റ്‌മെന്റ് കഴിഞ്ഞയുടനെ മുഖത്ത് ഗുരുതരമായ പൊള്ളലും വീക്കവുമുണ്ടായി. പിന്നീട് മുഖത്ത് മുറിവുണ്ടാകുകയും മുഖത്തെ ചർമം ഇരുണ്ടതായി മാറുകയും ചെയ്തു. നഷ്ടപരിഹാരം ആവശ്യപ്പെട്ട് ഏപ്രിൽ 26 ന് അനിത ക്ലിനിക്കിന് നിയമപരമായ നോട്ടീസ് അയച്ചു. എന്നാൽ ഏപ്രിൽ 30 ന് ക്ലിനിക്ക് ബാധ്യത നിഷേധിച്ചുകൊണ്ട് മറുപടി നൽകി.

തുടർന്ന് നടപടിക്രമ ഫീസ് തിരികെ നൽകണമെന്നും നഷ്ടപരിഹാരമായി 3 ലക്ഷം രൂപയും കേസ് ചെലവുകൾക്കായി 25,000 രൂപയും ആവശ്യപ്പെട്ട് അവർ ഉപഭോക്തൃ കമ്മീഷനെ സമീപിച്ചു.

പണമടച്ച തീയതി മുതൽ തിരിച്ചടവ് വരെ 9 ശതമാനം വാർഷിക പലിശ സഹിതം 1,100 രൂപ റീഫണ്ട് നൽകുക. ചർമ്മത്തിനേറ്റ പരിക്കിനും മാനസിക വേദനയ്ക്കും ഒരു ലക്ഷം രൂപ നഷ്ടപരിഹാരം നൽകുക. കേസ് ചെലവുകൾക്കായി 10,000 രൂപ നൽകുക എന്നിങ്ങനെയാണ് കമ്മീഷൻ വിധിച്ചത്.