പെട്രോളിലെ എഥനോൾ: പരിധി 20 ശതമാനം, കണ്ടെത്തിയത് 31.2 വരെ; കേന്ദ്രത്തോട് വിശദീകരണം തേടി കർണാടക

ബംഗളൂരു: രാജ്യത്ത് പെട്രോളിൽ പരമാവധി 20 ശതമാനം എഥനോൾ കലർത്താനാണ് കേന്ദ്രസർക്കാർ അനുമതി നൽകിയിട്ടുള്ളതെങ്കിലും കർണാടകയിൽ വിൽക്കുന്ന പെട്രോളിൽ 31.2 ശതമാനം വരെ എഥനോൾ കണ്ടെത്തി. സംസ്ഥാനത്തിന്റെ വിവിധ ഭാഗങ്ങളിൽനിന്ന് ശേഖരിച്ച 63 പെട്രോൾ സാമ്പിളുകൾ പരിശോധിച്ചതിലാണ് അനുവദനീയമായ അളവിനെക്കാൾ കൂടുതൽ എഥനോൾ കണ്ടെത്തിയത്. ഏകദേശം 80 ശതമാനം സാമ്പിളുകളിലും എഥനോളിന്റെ അളവ് 20 ശതമാനത്തിന് മുകളിലാണെന്ന് സംസ്ഥാന ഭക്ഷ്യ പൊതുവിതരണ മന്ത്രി റിസ്വാൻ അർഷാദ് വെള്ളിയാഴ്ച വാർത്താസമ്മേളനത്തിൽ അറിയിച്ചു. സംഭവത്തിൽ കേന്ദ്രസർക്കാരിനോടും എണ്ണക്കമ്പനികളോടും വിശദീകരണം തേടിയിട്ടുണ്ട്.

ബംഗളൂരു, കോലാർ, ചിക്കബെല്ലാപുര, ബംഗളൂരു റൂറൽ, രാമനഗര, മംഗളൂരു, തുമകൂരു തുടങ്ങിയ സ്ഥലങ്ങളിൽനിന്നാണ് സാമ്പിളുകൾ ശേഖരിച്ചത്. ഇന്ത്യൻ ഓയിൽ കോർപ്പറേഷൻ (IOCL), ഹിന്ദുസ്ഥാൻ പെട്രോളിയം (HPCL), ഭാരത് പെട്രോളിയം (BPCL), നയാര എനർജി, ഷെൽ, മംഗളൂരു റിഫൈനറി ആൻഡ് പെട്രോകെമിക്കൽസ് (MRPL) എന്നിവയുടെ പെട്രോളാണ് പരിശോധിച്ചത്. ഇന്ത്യൻ ഓയിലിന്റെ സാമ്പിളിൽ 31.2 ശതമാനവും എച്ച്പിസിഎൽ പവർ പെട്രോളിൽ 30.5 ശതമാനവും എഥനോൾ കണ്ടെത്തി. മറ്റു സാമ്പിളുകളിൽ 27, 26.5, 26.1, 25.5, 24.2 ശതമാനം എന്നിങ്ങനെയും എഥനോൾ കണ്ടെത്തിയിട്ടുണ്ട്. ഏറ്റവും കുറഞ്ഞ അളവ് 13.5 ശതമാനമാണ്.

പെട്രോളിന്റെ മൈലേജ് കുറയുന്നതായും വാഹനങ്ങൾക്ക് അടിക്കടി അറ്റകുറ്റപ്പണി ആവശ്യമായി വരുന്നതായും വാഹന ഉടമകളിൽനിന്ന് പരാതികൾ ലഭിച്ചതിനെത്തുടർന്നാണ് സർക്കാർ പരിശോധന നടത്തിയത്. ആദ്യം സാമ്പിളുകൾ ഇന്ത്യൻ ഓയിലിന്റെയും ഭാരത് പെട്രോളിയത്തിന്റെയും ലബോറട്ടറികളിലേക്ക് അയച്ചെങ്കിലും പരിശോധനാ റിപ്പോർട്ടുകളിൽ എഥനോളിന്റെ അളവ് രേഖപ്പെടുത്തിയിരുന്നില്ലെന്ന് മന്ത്രി പറഞ്ഞു. 63 സാമ്പിളുകളിലെ എഥനോൾ അളവ് സംബന്ധിച്ച ചോദ്യത്തിന് കമ്പനികളൊന്നും മറുപടി നൽകിയില്ല. ഇതിൽ സംശയം തോന്നിയതോടെയാണ് നാഷണൽ അക്രഡിറ്റേഷൻ ബോർഡ് ഫോർ ടെസ്റ്റിങ് ആൻഡ് കാലിബ്രേഷൻ ലബോറട്ടറീസ് (NABL) അംഗീകാരമുള്ള സ്വകാര്യ ലബോറട്ടറികളിൽ പരിശോധന നടത്തിയതെന്നും മന്ത്രി വ്യക്തമാക്കി.

അമിതമായി എഥനോൾ കലർത്തുന്നത് വാഹനങ്ങളുടെ പ്രവർത്തനക്ഷമതയെ ബാധിക്കുമെന്നും പ്രത്യേകിച്ച് പഴയ വാഹനങ്ങളിൽ എൻജിൻ തകരാറുകൾക്കും മൈലേജ് കുറയുന്നതിനും കാരണമാകാമെന്നും സർക്കാർ മുന്നറിയിപ്പ് നൽകി. രാജ്യത്തെ 35 കോടി വാഹനങ്ങളിൽ 99 ശതമാനവും 20 ശതമാനത്തിൽ കൂടുതൽ എഥനോൾ കലർത്തിയ പെട്രോൾ ഉപയോഗിക്കാൻ രൂപകൽപ്പന ചെയ്തവയല്ലെന്നാണ് മന്ത്രിയുടെ വാദം. 2023 ഏപ്രിലിനുശേഷം പുറത്തിറങ്ങിയ വാഹനങ്ങൾക്കുപോലും ഇ20 ഇന്ധനം ഉപയോഗിക്കാനുള്ള അംഗീകാരമാണ് നൽകിയിട്ടുള്ളത്. പെട്രോൾ പമ്പുകളിലെ ചില ഇന്ധന വിതരണ യന്ത്രങ്ങൾ 15 ശതമാനം വരെ എഥനോൾ കലർത്തിയ ഇന്ധനം കൈകാര്യം ചെയ്യാൻ മാത്രം രൂപകൽപ്പന ചെയ്തവയാണെന്നും അദ്ദേഹം ചൂണ്ടിക്കാട്ടി.

എഥനോൾ കലർത്തിയ പെട്രോൾ ഉപയോഗിക്കുന്നതിലൂടെ മൈലേജ് കുറയുന്നതും വാഹനങ്ങളുടെ അറ്റകുറ്റപ്പണിയും കാരണം രാജ്യത്തെ ഉപഭോക്താക്കൾക്ക് പ്രതിവർഷം 1.01 ലക്ഷം കോടി രൂപയുടെ സാമ്പത്തിക ബാധ്യതയുണ്ടാകാമെന്നാണ് കർണാടക സർക്കാരിന്റെ കണക്കുകൂട്ടൽ. മൈലേജ് പത്ത് ശതമാനം കുറയുന്നതിലൂടെ 62,000 കോടി രൂപയും വാഹനങ്ങളുടെ അറ്റകുറ്റപ്പണിക്ക് 39,000 കോടി രൂപയും ചെലവാകുമെന്നാണ് സർക്കാരിന്റെ അനുമാനം. എന്നാൽ ഈ തുക യഥാർഥത്തിൽ സംഭവിച്ച നഷ്ടമായി സ്ഥിരീകരിച്ചിട്ടില്ല. 2021ലെ നീതി ആയോഗ് റിപ്പോർട്ട് പ്രകാരം ഇ20 ഇന്ധനത്തിനായി പ്രത്യേകം രൂപകൽപ്പന ചെയ്ത വാഹനങ്ങളിൽ മൈലേജ് ഒന്ന് മുതൽ രണ്ട് ശതമാനം വരെയും പഴയ കാറുകളിൽ ആറ് മുതൽ ഏഴ് ശതമാനം വരെയും പഴയ ഇരുചക്രവാഹനങ്ങളിൽ മൂന്ന് മുതൽ നാല് ശതമാനം വരെയും കുറയാൻ സാധ്യതയുണ്ട്.

എഥനോൾ കലർത്തുന്നതിലൂടെ അസംസ്കൃത എണ്ണയുടെ ഇറക്കുമതി കുറയ്ക്കാനും വിദേശനാണ്യം ലാഭിക്കാനും കഴിയുമെന്നാണ് കേന്ദ്രസർക്കാരിന്റെ വാദം. എന്നാൽ ഇതിന്റെ സാമ്പത്തിക നേട്ടം വാഹന ഉടമകൾക്ക് ലഭിക്കുന്നില്ലെന്ന് റിസ്വാൻ അർഷാദ് ചൂണ്ടിക്കാട്ടി. 2025–26 സാമ്പത്തികവർഷത്തിൽ ഇന്ത്യൻ ഓയിൽ, ഭാരത് പെട്രോളിയം, ഹിന്ദുസ്ഥാൻ പെട്രോളിയം കമ്പനികൾ ചേർന്ന് 77,821 കോടി രൂപ ലാഭമുണ്ടാക്കിയെന്നാണ് സംസ്ഥാന സർക്കാരിന്റെ കണക്ക്. ഇതിനിടെ അധിക എഥനോൾ കലർത്തുന്നതിന്റെ സാമ്പത്തിക ബാധ്യത ഉപഭോക്താക്കൾ എന്തിന് വഹിക്കണമെന്നും മന്ത്രി ചോദിച്ചു. ഇ20 ഇന്ധനം നടപ്പാക്കുന്നതോടെ പെട്രോൾ വില ലിറ്ററിന് 55 രൂപയായി കുറയുമെന്ന 2018ലെ കേന്ദ്രമന്ത്രി നിതിൻ ഗഡ്കരിയുടെ പ്രസ്താവനയും അദ്ദേഹം ഓർമിപ്പിച്ചു.

20 ശതമാനത്തിലധികം എഥനോൾ അടങ്ങിയ പെട്രോൾ എങ്ങനെ വിപണിയിലെത്തുന്നുവെന്ന് കേന്ദ്ര പെട്രോളിയം മന്ത്രി ഹർദീപ് സിങ് പുരിയും കേന്ദ്ര ഗതാഗതമന്ത്രി നിതിൻ ഗഡ്കരിയും വിശദീകരിക്കണമെന്ന് കർണാടക സർക്കാർ ആവശ്യപ്പെട്ടു. അധിക എഥനോൾ കലർത്തിയ എണ്ണക്കമ്പനികൾക്കെതിരെ നടപടിയെടുക്കണമെന്നും വാഹനങ്ങൾക്ക് സംഭവിച്ച തകരാറുകൾക്ക് നഷ്ടപരിഹാരം നൽകാനുള്ള സംവിധാനം ഏർപ്പെടുത്തണമെന്നും ആവശ്യപ്പെട്ടിട്ടുണ്ട്. പെട്രോൾ പമ്പുകളിൽ ഇന്ധനത്തിലെ എഥനോളിന്റെ ശതമാനം നിർബന്ധമായും പ്രദർശിപ്പിക്കണം. വിവിധ അനുപാതത്തിലുള്ള ഇന്ധനങ്ങളിൽനിന്ന് തെരഞ്ഞെടുക്കാനുള്ള അവസരം ഉപഭോക്താക്കൾക്ക് നൽകണമെന്നും സർക്കാർ ആവശ്യപ്പെട്ടു. അതേസമയം, എഥനോൾ കലർത്തുന്നതിന്റെ അളവ് 20 ശതമാനത്തിന് മുകളിലേക്ക് ഉയർത്താൻ നിലവിൽ പദ്ധതിയില്ലെന്നാണ് കേന്ദ്രസർക്കാർ നേരത്തെ വ്യക്തമാക്കിയിട്ടുള്ളത്.