'ദൈവിക ഇടപെടലല്ല, ഭരണഘടനയാണ് അവസാനവാക്ക്': വിധിപ്രസ്താവങ്ങളിൽ ഭരണഘടന മാത്രം മാതൃകയെന്ന് ജസ്റ്റിസ് അഭയ് എസ് ഓഖ

ന്യൂഡൽഹി: കോടതി വിധിപ്രസ്താവങ്ങളിൽ ഭരണഘടനയല്ലാതെ മറ്റൊരു സ്രോതസ്സും പരിഗണിക്കേണ്ടതില്ലെന്ന് സുപ്രീം കോടതി മുൻ ജഡ്ജി ജസ്റ്റിസ് അഭയ് എസ് ഓഖ. വിധിന്യായങ്ങളിൽ 'ദൈവിക ഇടപെടലോ' മറ്റ് ബാഹ്യമായ കാര്യങ്ങളോ സ്വാധീനം ചെലുത്തുന്നത് ഭരണഘടനാ വിരുദ്ധമാണെന്നും അദ്ദേഹം പറഞ്ഞു.

ഒരു വാർത്താ മാധ്യമത്തിന് നൽകിയ അഭിമുഖത്തിലാണ് അദ്ദേഹം തന്റെ നിലപാട് വ്യക്തമാക്കിയത്. ജഡ്ജിമാർ സത്യപ്രതിജ്ഞ ചെയ്യുന്നത് ഭരണഘടനയോടും നിയമങ്ങളോടുമുള്ള വിശ്വസ്തത പുലർത്താനാണ്.

അല്ലാതെ ഏതെങ്കിലും മതവിശ്വാസത്തോടോ അതീന്ദ്രിയമായ ശക്തികളോടോ ഉള്ള കൂറല്ല അവിടെ വ്യക്തമാക്കേണ്ടത്. രാജ്യത്തെ നിയമവ്യവസ്ഥയുടെ ഏക ഉറവിടം ഭരണഘടന മാത്രമാണെന്നും മറ്റ് വിശ്വാസങ്ങളെ ഇതിലേക്ക് കൂട്ടിക്കലർത്തുന്നത് നീതിന്യായ വ്യവസ്ഥയുടെ നിഷ്പക്ഷതയെ ബാധിക്കുമെന്നും അദ്ദേഹം കൂട്ടിച്ചേർത്തു.

ചില കോടതി വിധികൾ വരുന്നത് 'ദൈവികമായ പ്രേരണ'യാലാണെന്ന തരത്തിൽ അടുത്തിടെ ചില ജഡ്ജിമാർ നടത്തിയ പരാമർശങ്ങളുടെ പശ്ചാത്തലത്തിലാണ് ജസ്റ്റിസ് ഓഖയുടെ ഈ പ്രസ്താവന.

മതേതര രാജ്യമായ ഇന്ത്യയിൽ നീതിപീഠങ്ങൾ ശാസ്ത്രീയവും യുക്തിസഹവുമായ വസ്തുതകളെയും ഭരണഘടനാ മൂല്യങ്ങളെയും അടിസ്ഥാനമാക്കിയാണ് തീരുമാനങ്ങൾ എടുക്കേണ്ടത്. വ്യക്തിപരമായ വിശ്വാസങ്ങൾ ഔദ്യോഗിക കൃത്യനിർവഹണത്തിൽ കലർത്തുന്നത് ജനാധിപത്യത്തിന് ഗുണകരമല്ലെന്നും അദ്ദേഹം ഓർമ്മിപ്പിച്ചു.