സർക്കാർ ജോലിക്ക് വേണ്ടി അമ്മയെ മകൾ കൊലപ്പെടുത്തി; വാഹനാപകടമെന്ന് വരുത്തി തീർക്കാൻ ശ്രമം

ജയ്പൂർ: അമ്മയുടെ സർക്കാർ ജോലി സ്വന്തമാക്കുന്നതിനായി അമ്മയെ കൊലപ്പെടുത്തിയ മകൾ ഉൾപ്പടെ ആറ് പേർ അറസ്റ്റിൽ. ആയുഷി എന്ന യുവതിയും അവരുടെ ബന്ധുക്കൾ ഉൾപ്പടെ ആറ് പേരാണ് പിടിയിലായത്. സംഭവത്തിൽ ഒരാൾ ഒളിവിലാണെന്ന് പൊലീസ് പറഞ്ഞു. ഇയാൾക്കായുള്ള അന്വേഷണം നടത്തി വരികയാണ്. പ്രതാപ് ന​ഗറിലെ രവീന്ദ്ര ന​ഗർ സ്വദേശിയായ നീരജ് ശർമ്മയെയാണ് (45) അമിതവേ​​ഗതയിൽ എത്തിയ സ്കോർപിയോ വാഹനം ഇടിച്ചിട്ടത്. അപകടത്തിൽ ​ഗുരുതരമായ പരിക്കേറ്റ് നീരജ് ശർമ മരണപ്പെട്ടു.

ആദ്യഘട്ടത്തിൽ അപകടമരണമായി തോന്നിയെങ്കിലും പിന്നീട് മരണത്തിൽ ദുരൂഹത ആരോപിച്ച് സഹോദരൻ രാകേഷ് രം​ഗത്തുവന്നു. അമ്മയുടെ മരണത്തിൽ തനിക്ക് സംശയമുണ്ടെന്നും അന്വേഷണം വേണമെന്നും ആവശ്യപ്പെട്ട് പൊലീസിൽ പരാതി നൽകി. ഇതിന്റെ അടിസ്ഥാനത്തിൽ നടത്തിയ അന്വേഷണമാണ് മകളുടെ ക്രൂരകൃത്യത്തിൽ എത്തിയത്. അമ്മയെ കൊലപ്പെടുത്താൻ മകൾ നൽകിയ ക്വട്ടേഷൻ ആയിരുന്നു ആ അപകടമെന്ന് പൊലീസ് അന്വേഷണത്തിൽ കണ്ടെത്തി.

ഒരു വർഷം മുൻപ് നീരജിന്റെ ഭർത്താവ് വിജയ് കുമാർ ശർമ മരണപ്പെട്ടിരുന്നു. തുടർന്ന് അനുകമ്പാടിസ്ഥാനത്തിൽ കോടതിയിൽ ക്ലർക്ക് ജോലി നീരജിന് ലഭിച്ചു. ഈ ജോലി തനിക്ക് ലഭിക്കണമെന്ന അതിയായ ആ​ഗ്രഹത്തിൽ മകൾ, അമ്മയെ കൊലപ്പെടുത്താൻ തീരുമാനിക്കുകയായിരുന്നു. പിതാവിന്റെ മരണശേഷം ആ ജോലി തനിക്ക് നൽകണമെന്ന് അമ്മയോട് ആവശ്യപ്പെട്ടിരുന്നുവെങ്കിലും അത് നീരജ് നിരസിച്ചിരുന്നു. ഇതിലുണ്ടായ പ്രകോപനമാണ് ക്രൂരമായ കൊലപാതകത്തിലേയ്ക്ക് നയിച്ചതെന്ന് പൊലീസ് അറിയിച്ചു. സംഭവത്തിൽ വിശദമായ അന്വേഷണം നടത്തി വരികയാണ്. കേസിൽ ഒളിവിൽ പോയ പ്രതിക്കായി തെരച്ചിൽ ഊർജിതമായി നടക്കുകയാണെന്ന് പൊലീസ് കൂട്ടിച്ചേർത്തു.