'ജഗ് വസന്ത്' ഗുജറാത്തിലെത്തി; ഹോർമുസ് കടലിടുക്ക് കടന്നത് നാവികസേനയുടെ കാവലിൽ

ഗാന്ധിനഗർ: പശ്ചിമേഷ്യയിൽ യുദ്ധം രൂക്ഷമായതിനെത്തുടർന്ന് ഹോർമുസ് കടലിടുക്കിൽ കുടുങ്ങിയ ഇന്ത്യൻ പാചകവാതക കപ്പൽ 'ജഗ് വസന്ത്' (Jag Vasant) സുരക്ഷിതമായി ഗുജറാത്തിലെത്തി. ഏകദേശം 47,600 മെട്രിക് ടൺ എൽപിജിയുമായി എത്തിയ കപ്പൽ വെള്ളിയാഴ്ച രാവിലെ ഗുജറാത്തിലെ കണ്ട്ല തുറമുഖത്താണ് അടുത്തത്.

ഇറാൻ-ഇസ്രയേൽ സംഘർഷത്തെത്തുടർന്ന് ഹോർമുസ് കടലിടുക്ക് ഏതാണ്ട് പൂർണ്ണമായും അടച്ചിട്ട നിലയിലായിരുന്നു. ഈ മേഖലയിൽ കുടുങ്ങിക്കിടന്ന 22 ഇന്ത്യൻ കപ്പലുകളിൽ ഒന്നാണ് ജഗ് വസന്ത്. ഇന്ത്യൻ നാവികസേനയുടെ കപ്പലുകളുടെ അകമ്പടിയോടെയാണ് ഈ ചരക്കുകപ്പൽ അപകടമേഖല പിന്നിട്ടത്.

ഇറാനിയൻ തീരത്തോട് ചേർന്നുള്ള സവിശേഷമായ പാതയിലൂടെയാണ് കപ്പൽ യാത്ര ചെയ്തതെന്ന് സാറ്റലൈറ്റ് ദൃശ്യങ്ങൾ വ്യക്തമാക്കുന്നു. രാജ്യത്ത് പാചകവാതക ക്ഷാമം നേരിടുമെന്ന ആശങ്ക നിലനിൽക്കെ ജഗ് വസന്തിന്റെ വരവ് വലിയ ആശ്വാസമാണ് നൽകുന്നത്.

ഈ കപ്പലിന് പുറമെ 'പൈൻ ഗ്യാസ്' എന്ന മറ്റൊരു കപ്പൽ കൂടി 45,000 ടൺ എൽപിജിയുമായി വരും ദിവസങ്ങളിൽ മംഗലാപുരം തുറമുഖത്തെത്തും. ഈ രണ്ട് കപ്പലുകളിലുമായി എത്തുന്ന വാതകം ഇന്ത്യയുടെ ഒരു ദിവസത്തെ ആകെ ആവശ്യത്തിന് തുല്യമാണ്.

ഹോർമുസ് കടലിടുക്കിലൂടെ ഇന്ത്യൻ കപ്പലുകൾക്ക് സുരക്ഷിത പാത ഒരുക്കുന്നതിനായി പ്രധാനമന്ത്രി നരേന്ദ്ര മോദിയും വിദേശകാര്യ മന്ത്രി എസ് ജയശങ്കറും ഇറാൻ അധികൃതരുമായി നിരന്തരം ചർച്ചകൾ നടത്തിയിരുന്നു. ഇതിന്റെ ഫലമായാണ് സങ്കീർണ്ണമായ യുദ്ധസാഹചര്യത്തിലും കപ്പലുകൾക്ക് ഇന്ത്യയിലെത്താൻ കഴിഞ്ഞത്.

നിലവിൽ 20 ഇന്ത്യൻ കപ്പലുകൾ കൂടി ഗൾഫ് മേഖലയിൽ കുടുങ്ങിക്കിടക്കുന്നുണ്ട്. ഇവയെയും സുരക്ഷിതമായി എത്തിക്കാനുള്ള ശ്രമങ്ങൾ തുടരുകയാണെന്ന് കേന്ദ്ര ഷിപ്പിംഗ് മന്ത്രാലയം അറിയിച്ചു.