രജൗറിയിലെ നിയന്ത്രണ രേഖയ്ക്ക് സമീപം പാക് ഡ്രോണുകൾ; സൈന്യം വെടിയുതിർത്തു

ശ്രീന​ഗർ : ജമ്മു- കശ്മീരിലെ രജൗറി ജില്ലയിലെ നിയന്ത്രണ രേഖ (എൽഒസി) വഴി ഇന്ത്യൻ പ്രദേശത്തേക്ക് പ്രവേശിച്ച നിരവധി പാക് ഡ്രോണുകൾ ഇന്ത്യൻ സൈന്യം വെടിവച്ചതായി സൈനിക ഉദ്യോഗസ്ഥർ പറഞ്ഞു. പാക് അധിനിവേശ കശ്മീരിലേക്ക് (പിഒകെ) മടങ്ങുന്നതിന് മുമ്പ് ഡ്രോണുകൾ മഞ്ചകോട്ട് സെക്ടറിൽ കുറച്ചുനേരം പറന്നതായും ഉദ്യോഗസ്ഥർ പറഞ്ഞു.

കഴിഞ്ഞ മൂന്ന് ദിവസമായി ജമ്മു സെക്ടറിലെ അതിർത്തി പ്രദേശങ്ങളിൽ പാകിസ്ഥാൻ ഡ്രോണുകൾ കണ്ടതായി ഇന്ത്യൻ സൈന്യം ചൊവ്വാഴ്ച പാകിസ്ഥാൻ ഡയറക്ടർ ജനറൽ ഓഫ് മിലിട്ടറി ഓപ്പറേഷൻസിനെ (ഡിജിഎംഒ) അറിയിച്ചതായി കരസേനാ മേധാവി ജനറൽ ഉപേന്ദ്ര ദ്വിവേദി പറഞ്ഞതിന് പിന്നാലെയാണ് പുതിയ ഡ്രോണുകൾ കണ്ടത്. നിയന്ത്രണ രേഖയിൽ ഡ്രോണുകൾ കണ്ടെത്തിയതിനെത്തുടർന്ന് ഇന്ത്യൻ സൈന്യം കൗണ്ടർ ഏരിയൽ സിസ്റ്റം (യുഎഎസ്) നടപടികൾ സ്വീകരിച്ചതായി പ്രതിരോധ വൃത്തങ്ങൾ അറിയിച്ചു.

ചൊവ്വ വൈകിട്ട് 7 മണിയോടെ, രജൗറിയിലെ ചിംഗസ് പ്രദേശത്തെ ദുംഗ ഗാലയ്ക്ക് മുകളിലൂടെയാണ് ഡ്രോണുകൾ പ്രവേശിച്ചത്. സൈന്യം വെടിയുതിർത്തതോടെ ഡ്രോണുകൾ അപ്രത്യക്ഷമാവുകയും മറുവശത്തേക്ക് പിൻവാങ്ങുകയും ചെയ്തതായി ഉദ്യോഗസ്ഥർ പറഞ്ഞു. ധേരി ധാര ഗ്രാമത്തിന് മുകളിലൂടെ വൈകിട്ട് 7.35 ഓടെ ഡ്രോൺ പോലെയുള്ള രണ്ട് വസ്തുക്കളുടെ ചലനം സൈനിക ഉദ്യോഗസ്ഥർ കണ്ടെത്തി. അവയെ ലക്ഷ്യമാക്കി നിരവധി റൗണ്ടുകൾ വെടിവച്ചതായി സൈന്യം അറിയിച്ചു.

ഞായറാഴ്ച, നൗഷേര സെക്ടറിൽ കാവൽ നിൽക്കുന്ന സൈനികർ ഗനിയ-കൽസിയൻ ഗ്രാമത്തിന് മുകളിലൂടെ ഡ്രോൺ പറക്കുന്നത് കണ്ടെത്തിയിരുന്നു. ഇതേ ദിവസം തന്നെ തെര്യത്തിലെ ഖബ്ബാർ ഗ്രാമം, രജൗറിയിലെ കലക്കോട്ട്, പൂഞ്ച് ജില്ലയിലെ മാൻകോട്ട് പ്രദേശത്തെ ടെയ്ൻ-ടോപ്പ, സാംബയിലെ രാംഗഡ് സെക്ടറിലെ ചക് ബാബ്രൽ ഗ്രാമം എന്നിവിടങ്ങളിലും ഡ്രോണുകളുടെ ചലനം കണ്ടെത്തി.

വെള്ളിയാഴ്ച രാത്രി സാംബയിലെ അന്താരാഷ്ട്ര അതിർത്തിക്കടുത്തുള്ള ഘഗ്‌വാളിലെ പലൂര ഗ്രാമത്തിൽ നിന്ന് പാകിസ്ഥാനിൽ നിന്ന് ഡ്രോൺ ഉപയോഗിച്ച് വർഷിച്ച ആയുധ ശേഖരം സുരക്ഷാ സേന കണ്ടെടുത്തു. രണ്ട് പിസ്റ്റളുകൾ, മൂന്ന് മാഗസിനുകൾ, 16 റൗണ്ടുകൾ, ഒരു ഗ്രനേഡ് എന്നിവയാണ് കണ്ടെത്തിയത്.