കൊടക് ജില്ലയിൽ കാട്ടാന ആക്രമണം: ഐപിഎസ് ഉദ്യോഗസ്ഥന്റെ ഭാര്യ കൊല്ലപ്പെട്ടു

കൊടക്: കൊടക് ജില്ലയിലെ തിത്തിമതിക്ക് സമീപമുള്ള കാപ്പിത്തോട്ടത്തിൽ കാട്ടാനയുടെ ആക്രമണത്തിൽ മുതിർന്ന ഐപിഎസ് ഉദ്യോഗസ്ഥന്റെ ഭാര്യ ദാരുണമായി കൊല്ലപ്പെട്ടു.

നാഗാലാൻഡ് കേഡർ 1991 ബാച്ച് ഐപിഎസ് ഉദ്യോഗസ്ഥൻ എ സുനിൽ അച്ചയ്യയുടെ ഭാര്യ സന്ധ്യ അച്ചയ്യയാണ് (51) മരിച്ചത്. വെള്ളിയാഴ്ച രാവിലെ ഒൻപതോടെ തിത്തിമതിക്കടുത്തുള്ള കോണനക്കട്ടെ ഗ്രാമത്തിലെ എസ്റ്റേറ്റിലായിരുന്നു സംഭവം.

എസ്റ്റേറ്റിൽ ജോലി മേൽനോട്ടം വഹിക്കാനെത്തിയതായിരുന്നു സന്ധ്യയും മറ്റ് രണ്ടുപേരും. ഈ സമയം എസ്റ്റേറ്റിനുള്ളിൽ നിലയുറപ്പിച്ചിരുന്ന കാട്ടാന ഇവരെ ആക്രമിക്കുകയായിരുന്നു.

കൂടെയുണ്ടായിരുന്നവർ നിസ്സാര പരിക്കുകളോടെ രക്ഷപ്പെട്ടെങ്കിലും, ഗുരുതരമായി പരിക്കേറ്റ സന്ധ്യ ആശുപത്രിയിലേക്കുള്ള യാത്രാമധ്യേ മരണപ്പെടുകയായിരുന്നു.ഡിജിപിയായി ഡൽഹിയിൽ സേവനമനുഷ്ഠിക്കുന്ന സുനിൽ അച്ചയ്യയെ മുഖ്യമന്ത്രി ഡി.കെ. ശിവകുമാർ വിളിച്ച് അനുശോചനം അറിയിച്ചു.