മാലദ്വീപിന് ഇന്ത്യയുടെ സാമ്പത്തിക സഹായം; 3000 കോടിയുടെ കറൻസി സ്വാപ്പിന് അനുമതി

ന്യൂഡൽഹി : അയൽരാജ്യമായ മാലദ്വീപിന് സാമ്പത്തിക പ്രതിസന്ധി മറികടക്കാൻ സഹായവുമായി ഇന്ത്യ. സാർക്ക് (SAARC) കറൻസി സ്വാപ്പ് ചട്ടക്കൂടിന് കീഴിൽ 30 ബില്യൺ ഡോളർ പിൻവലിക്കാൻ കേന്ദ്ര സർക്കാർ മാലദ്വീപിന് അനുമതി നൽകി. മാലദ്വീപിന്റെ വിദേശനാണ്യ ശേഖരത്തിലുണ്ടായ കുറവ് പരിഹരിക്കുന്നതിനും സാമ്പത്തിക സ്ഥിരത ഉറപ്പാക്കുന്നതിനുമാണ് ഈ അടിയന്തര സഹായം.

മാലദ്വീപിന്റെ സെൻട്രൽ ബാങ്കായ മാലദ്വീപ് മോണിറ്ററി അതോറിറ്റിക്ക് വിദേശനാണ്യ വിപണിയിലെ പ്രതിസന്ധി നേരിടാൻ ഈ തുക വിനിയോഗിക്കാം. പശ്ചിമേഷ്യൻ സംഘർഷം ഉൾപ്പെടെയുള്ള ആഗോള സാഹചര്യങ്ങൾ മാലദ്വീപിന്റെ സമ്പദ്‌വ്യവസ്ഥയെ ബാധിച്ച പശ്ചാത്തലത്തിലാണ് ഇന്ത്യയുടെ ഇടപെടൽ.

സാർക്ക് രാജ്യങ്ങൾക്കിടയിലുള്ള സാമ്പത്തിക സഹകരണം മെച്ചപ്പെടുത്തുന്നതിനായി റിസർവ് ബാങ്ക് ഓഫ് ഇന്ത്യ രൂപീകരിച്ച സംവിധാനമാണ് കറൻസി സ്വാപ്പ്. കുറഞ്ഞ പലിശ നിരക്കിൽ വിദേശനാണ്യം ലഭ്യമാക്കാൻ ഇത് സഹായിക്കും.

മാലദ്വീപിൽ പുതിയ സർക്കാർ അധികാരമേറ്റതിന് ശേഷം ഇരുരാജ്യങ്ങളും തമ്മിലുള്ള ബന്ധത്തിൽ ചില അസ്വാരസ്യങ്ങൾ ഉണ്ടായിരുന്നു. ഈ സാഹചര്യത്തിലും മാലദ്വീപിന് സാമ്പത്തിക സഹായം നൽകാനുള്ള ഇന്ത്യയുടെ തീരുമാനം 'പ്രഥമ പരി​ഗണന അയൽരാജ്യത്തിന്' എന്ന നയതന്ത്ര നിലപാടിന്റെ ഭാഗമായാണ് വിലയിരുത്തപ്പെടുന്നത്.

ഇന്ത്യൻ സമുദ്ര മേഖലയിലെ സുരക്ഷയും സാമ്പത്തിക വളർച്ചയും ഉറപ്പാക്കുന്നതിൽ മാലദ്വീപിന്റെ സാമ്പത്തിക ഭദ്രത ഇന്ത്യക്ക് നിർണായകമാണ്.

മാലദ്വീപിന്റെ വിനോദസഞ്ചാര മേഖലയും ഇറക്കുമതിയും പ്രതിസന്ധി നേരിടുന്ന ഘട്ടത്തിൽ ഇന്ത്യ നൽകുന്ന ഈ പിന്തുണ ഇരുരാജ്യങ്ങളും തമ്മിലുള്ള ഉഭയകക്ഷി ബന്ധം മെച്ചപ്പെടുത്താൻ സഹായിക്കും. നേരത്തെയും സമാനമായ സാഹചര്യങ്ങളിൽ ഇന്ത്യ മാലദ്വീപിന് സാമ്പത്തിക സഹായം നൽകിയിട്ടുണ്ട്.