print edition മോദി ഭരണത്തിൽ 
സ്ഥിതിവിവരക്കണക്കും പൊള്ള

ന്യൂഡൽഹി

മോദി ഭരണത്തിൽ ജിഡിപി അടക്കമുള്ള സ്ഥിതിവിവരക്കണക്കുകളും പൊള്ളയെന്ന്‌ തുറന്നുകാട്ടി അന്താരാഷ്‌ട്ര നാണ്യനിധി (ഐഎംഎഫ്‌). കണക്കുകൂട്ടലിൽ വലിയ പാളിച്ചകളും പോരായ്‌മകളുമുള്ളതിനാൽ ഇന്ത്യയുടെ മൊത്തം ആഭ്യന്തരഉൽപ്പാദന (ജിഡിപി) കണക്കുകളെയും മറ്റും പൂർണമായും വിശ്വാസത്തിലെടുക്കരുതെന്നും ഐഎംഎഫ് റിപ്പോര്‍ട്ടിൽപറയുന്നു. ഏറെ പാളിച്ചകളുള്ളതിനാൽ ഇന്ത്യയുടെ ദേശീയ അക്ക‍ൗണ്ട്‌ സ്ഥിതിവിവര കണക്കുകൾക്ക്‌ തീർത്തും മോശമായ സി ഗ്രേഡ്‌ മാത്രമാണ്‌ ഐഎംഎഫ്‌ നൽകിയത്‌.

കൃത്യമായ ഇടവേളകളിൽ സമയക്രമം പാലിച്ച്‌ ജിഡിപി കണക്കുകളും മറ്റും പുറത്തുവിടാൻ ഇന്ത്യക്ക്‌ കഴിയുന്നുണ്ട്‌. എന്നാൽ കണക്കുകൂട്ടലുകളിൽ ധാരാളം പോരായ്‌മകൾ. സ്ഥിതിവിവര കണക്കുകളുടെ വ്യാപ്‌തിയാണ്‌ ഒരു പ്രശ്‌നം. എല്ലാ മേഖലകളെയും സ്‌പർശിക്കുന്നില്ല. 2011–12 എന്ന കാലഹരണപ്പെട്ട അടിസ്ഥാനവർഷത്തെയാണ്‌ ഇപ്പോഴും ജിഡിപി കണക്കുകൂട്ടലിനും മറ്റുമായി ആധാരമാക്കുന്നത്‌. മൊത്തവില സൂചികയെയാണ്‌ പലപ്പോഴും ജിഡിപി കണക്കുകൾക്കായി ആശ്രയിക്കുന്നത്‌. ഉൽപ്പാദനവില സൂചിക പലപ്പോഴും ലഭ്യമല്ല.

"ഡി-ഫ്‌ളേറ്റർ' എന്ന സ്ഥിതിവിവര രീതിയിലൂടെയാണ്‌ വിപണിയിലെ ചരക്കുകളുടെയും സേവനങ്ങളുടെയും ശരാശരി വിലയിലെ മാറ്റങ്ങൾ കണക്കാക്കുന്നത്‌. ഇന്ത്യയുടെ "ഡിഫ്‌ളേറ്റർ" രീതി ആശ്രയിക്കുന്നത് മൊത്തവില സൂചിക കൈമാറുന്ന കണക്കുകളെ മാത്രമാണ്‌. ഇത്‌ യാഥാർഥ്യത്തോട്‌ പൊരുത്തപ്പെടുന്നതല്ലെന്ന്‌ ഇന്ത്യയുടെ സാമ്പത്തികചട്ടക്കൂടുമായി ബന്ധപ്പെട്ട വാർഷിക അവലോകനത്തിൽ ഐഎംഎഫ്‌ നിരീക്ഷിച്ചു. ഉപഭോക്‌തൃ വിലസൂചികയുടെ കാര്യത്തിലും പോരായ്‌മകൾ ഐഎംഎ-ഫ്‌ ചൂണ്ടിക്കാട്ടി. ഉപഭോക്‌തൃ വിലസൂചികയ്‌ക്ക് നൽകിയത്‌ ബി ഗ്രേഡ്‌ മാത്രം.

അതിനിടെ വെള്ളിയാഴ്‌ച പുറത്തുവിട്ട സ്ഥിതിവിവരകണക്കിൽ ജൂലൈ –സെപ്തംബര്‍ പാദത്തില്‍ രാജ്യത്തെ മൊത്ത ആഭ്യന്തര ഉൽപ്പാദനം (ജിഡിപി) 8.2 ശതമാനം വര്‍ധിച്ചുവെന്നാണ്‌ അവകാശവാദം.