തൊഴിലുറപ്പ് പദ്ധതി: 1.76 കോടി കുടുംബം പുറത്ത്‌

ന്യൂഡൽഹി: അഞ്ചുവർഷംകൊണ്ട്‌ ഗ്രാമീണ തൊഴിലുറപ്പ്‌ പദ്ധതിയിൽ നിന്ന്‌ കേന്ദ്രസർക്കാർ പുറത്താക്കിയത്‌ 1.76 കോടി കുടുംബത്തെ. പദ്ധതിക്കുള്ള ബജറ്റ്‌ വിഹിതം ഘട്ടം ഘട്ടമായി വെട്ടിക്കുറച്ചാണ്‌ ഇത്രയേറെപേരെ പുറത്താക്കിയത്. 2020–21 സാമ്പത്തികവർഷം 1.10 ലക്ഷം കോടി രൂപ പദ്ധതിക്ക്‌ അനുവദിച്ചപ്പോൾ 7.55 കോടി കുടുംബങ്ങൾ ഗുണഭോക്താക്കളായിരുന്നു. എന്നാൽ, 2024–25ൽ പദ്ധതിക്ക് അനുവദിച്ചത് 85680 കോടിരൂപ മാത്രം. ഇതോടെ പദ്ധതിയുടെ ​ഗുണഭോക്താക്കള്‍ 5.79 കോടി കുടുംബങ്ങളായി ചുരുങ്ങി. ബജറ്റ് വിഹിതത്തില്‍ 25000 കോടി രൂപ കേന്ദ്രസര്‍ക്കാര്‍ വെട്ടിക്കുറച്ചപ്പോൾ പുറത്തായത്‌ 1.76 കോടി കുടുംബം.

നിലവിൽ 100 തൊഴിൽദിനമാണ് പ്രതിവർഷം ലഭിക്കുക. ഇത്‌ 200ആയി വർധിപ്പിക്കണമെന്നും തൊഴിലുറപ്പ്‌ വേതനം 600 രൂപയിലേക്ക്‌ ഉയർത്തണമെന്നുമാണ് ട്രേഡ്‌യൂണിയനുകളും പ്രതിപക്ഷ പാർടികളും ആവശ്യപ്പെടുന്നത്‌. അടുത്ത അഞ്ച്‌ വർഷകാലത്തേക്ക്‌ പദ്ധതിവിഹിതത്തിൽ വർധനവ്‌ വരുത്തണമെന്ന്‌ കേരളമടക്കമുള്ള സംസ്ഥാനങ്ങളും നിരന്തരം ആവശ്യപ്പെടുന്നുണ്ട്‌. ഇതിന്‌ ബജറ്റ്‌ വിഹിതത്തിൽ ഗണ്യമായ വർധന ആവശ്യമാണ്‌. ധനമന്ത്രാലയത്തിന്‌ കീഴിലുള്ള എക്‌സ്‌പെൻഡിച്ചർ ഫിനാൻസ്‌ കമ്മിറ്റിയോട്‌ 5.23 ലക്ഷം കോടി രൂപ അനുവദിക്കണമെന്ന് ഗ്രാമവികസന മന്ത്രാലയം ആവശ്യപ്പെട്ടിരുന്നു. 2020–-2025 കാലത്ത്‌ 4.69 ലക്ഷം കോടി രൂപ മാത്രമാണ്‌ അനുവദിച്ചിരുന്നത്‌. ഇതിൽ നിന്ന്‌ 12 ശതമാനത്തിന്റെ വർധനവാണ്‌ ആവശ്യപ്പെടുന്നത്‌. ഇതും അംഗീകരിച്ചിട്ടില്ല.