ഡൽഹി സർവകലാശാല തെരഞ്ഞെടുപ്പ്‌ ഇന്ന്‌

ന്യ‍ൂഡൽഹി: ഡൽഹി സർവകലാശാല വിദ്യാർഥി യൂണിയൻ തെരഞ്ഞെടുപ്പ്‌ ഇന്ന്‌. തെരഞ്ഞെടുപ്പിൽ 54 ക്യാമ്പസുകളിൽ നിന്നായുള്ള വിദ്യാർഥികൾ പങ്കാളികളാവും. രണ്ടുലക്ഷത്തിലധികം വിദ്യാർഥികൾ പഠിക്കുന്ന സർവകലാശാലയിലെ കഴിഞ്ഞ തവണത്തെ തെരഞ്ഞെടുപ്പിൽ 29.7 ശതമാനം പേരാണ്‌ വോട്ട്‌ ചെയ്തതത്‌.

തെരഞ്ഞെടുപ്പിൽ ശക്തമായ മത്സരവുമായി എസ്‌എഫ്‌ഐ, ഐസ സംഘടനകളുടെ നേതൃത്വത്തിലുള്ള ഇടതുപക്ഷ വിദ്യാർഥി സഖ്യം രംഗത്തുണ്ട്‌. ബിഹാർ സ്വദേശി അഞ്ജലിയാണ്‌(ഐസ) പ്രസിഡന്റ്‌ സ്ഥാനാർഥി. അസമിൽ നിന്നുള്ള അഭിനന്ദന (എസ്‌എഫ്‌ഐ) സെക്രട്ടറി സ്ഥാനത്തേക്ക്‌ മത്സരിക്കുന്നു. സോഹൻകുമാർ (എസ്‌എഫ്‌ഐ), അഭിഷേക്‌ (ഐസ) എന്നിവരാണ്‌ വൈസ്‌ പ്രസിഡന്റ്‌, ജോയിന്റ്‌ സെക്രട്ടറി സ്ഥാനാർഥികൾ.

എബിവിപി, എൻഎസ്‌യുഐ, എഐഎസ്‌എഫ്‌ തുടങ്ങിയ സംഘടനകളും മത്സരരംഗത്തുണ്ട്‌. എബിവിപി, എൻഎസ്‌യുഐ സംഘടനകളുടെ നേതൃത്വത്തിൽ സംഘർഷമുണ്ടായതിനെ തുടർന്ന്‌ ക്യാമ്പസുകളിൽ കനത്ത സുരക്ഷയാണ്‌ ഏർപ്പെടുത്തിയിരിക്കുന്നത്‌. നാളെയാണ്‌ വോട്ടെണ്ണൽ.