ഡൽഹി സർവകലാശാല തെരഞ്ഞെടുപ്പ്: എസ്എഫ്ഐക്ക് മികച്ച നേട്ടം

ന്യൂഡൽഹി: ഡൽഹി സർവകലാശാല വിദ്യാർഥി യൂണിയൻ തെരഞ്ഞെടുപ്പിൽ മികച്ച വിജയം നേടി എസ്എഫ്ഐ. ഡൽഹി സ്കൂൾ ഓഫ് സോഷ്യൽ വർക്കിൽ മത്സരിച്ച എല്ലാ സീറ്റുകളിലും എസ്എഫ്ഐ വിജയിച്ചു. സാക്കിർ ഹുസൈൻ കോളേജിൽ രണ്ട് സീറ്റുകളിലും എസ്എഫ്ഐക്ക് ജയം.

ഡൽഹി സ്കൂൾ ഓഫ് സോഷ്യൽ വർക്കിൽ പ്രസിഡന്റായി ഹിമാൻഷു പാണ്ഡെയും ജനറൽ സെക്രട്ടറിയായി മപാനിയും തെരഞ്ഞെടുക്കപ്പെട്ടു. ആലപ്പുഴ ചേർത്തല സ്വദേശി ​ഗൗരി എക്‌സിക്യ‍ൂട്ടീവ്‌ ക‍ൗൺസിലറായി വിജയിച്ചു. 4 എക്സിക്യൂട്ടീവ് കമ്മിറ്റി സ്ഥാനങ്ങൾ എസ്എഫ്ഐ സ്വന്തമാക്കി. ഇടതുപക്ഷ വിദ്യാർഥി സഖ്യത്തിന്റെ ഭാഗമായി ഡൽഹി സർവകലാശാല ജനറൽ സെക്രട്ടറി സ്ഥാനത്തേക്ക്‌ മത്സരിച്ച എസ്എഫ്ഐ പ്രവര്‍ത്തക അഭിനന്ദന സംഘടനയുടെ ചരിത്രത്തിൽ ഏറ്റവും കൂടുതൽ വോട്ടുകൾ നേടി.

എബിവിപി കോട്ടയായിരുന്ന ഡൽഹി സാക്കിർ ഹുസൈൻ കോളേജിൽ മൂന്ന് സീറ്റുകളിലാണ് എസ്എഫ്ഐ മത്സരിച്ചത്. രണ്ട് സീറ്റുകളിലും എസ്എഫ്ഐ സ്ഥാനാർഥികൾ വിജയിച്ചു. ജനറൽ സെക്രട്ടറിയായി നാസിം ഖാനും സെൻട്രൽ ക‍ൗൺസിലറായി മുഹമ്മദ്‌ സായിദുമാണ്‌ തെരഞ്ഞെടുക്കപ്പെട്ടത്. ജോയിന്റ് സെക്രട്ടറി സ്ഥാനത്തേക്ക് എസ്എഫ്ഐ മികച്ച പോരാട്ടം നടത്തിയെങ്കിലും വെറും 8 വോട്ടുകൾക്ക് സ്ഥാനം നഷ്ടമായി.

ഡൽഹി സർവകലാശാലയിലെ പ്രസിഡന്റ്‌, ജനറൽ സെക്രട്ടറി, ജോയിന്റ്‌ സെക്രട്ടറി സ്ഥാനത്തേക്ക്‌ എബിവിപിയും വൈസ്‌ പ്രസിഡന്റ്‌ സ്ഥാനത്തേക്ക്‌ എൻഎസ്‌യുഐ സ്ഥാനാർഥിയും വിജയിച്ചു. എബിവിപിക്ക്‌ വേണ്ടി ഡൽഹി സർവകലാശാല അധികൃതർ വോട്ടിങ്‌ മെഷീനിൽ കൃത്രിമം കാണിച്ചതായി തെരഞ്ഞെടുപ്പിനിടെ തന്നെ ആരോപണമുയർന്നിരുന്നു.